Nëse keni ndonjëherë një kuti me ullinj të hapur që rri ditë të tëra në frigorifer, nuk jeni të vetëm.
Nga domatet për salcë, tek perimet e konservuara në kanaçe, të gjitha këto produkte janë të zakonshme në kuzhinat tona. Por ajo që shpesh harrojmë është se, pas hapjes, këto ushqime humbasin një pjesë të madhe të qëndrueshmërisë së tyre.
Ekspertët paralajmërojnë: edhe pse frigoriferi ndihmon në ruajtjen e freskisë, ai nuk është një zgjidhje magjike që e ndalon prishjen. Në fakt, ruajtja e dobët e ushqimeve të hapura jo vetëm që ndikon në cilësinë e tyre duke ndryshuar aromën, shijen apo ngjyrën, por mund të kthehet në rrezik të vërtetë për shëndetin.
Brenda frigoriferit mund të ndodhin shumë procese që nuk i shohim me sy. Aroma e një ushqimi të hapur mund të përhapet dhe të kontaminojë produkte të tjera, ndërsa prania e lagështirës mund të nxisë formimin e baktereve ose kërpudhave.
Rreziku më i madh lidhet me bakterin Clostridium botulinum, përgjegjës për botulizmin – një sëmundje e rrallë por potencialisht fatale, që mund të zhvillohet në ushqime të konservuara në mënyrë të gabuar.
Për më tepër, vetë përbërësit e paketimit, veçanërisht në kanaçet metalike, mund të lëshojnë substanca të dëmshme kur hapen dhe bien në kontakt me ajrin. Ky është rasti i oksidimit të metalit dhe i bisfenolit A (BPA) që përdoret në veshjet plastike të brendshme të disa paketimeve.
Çelësi është transferimi. Sapo të hapni një pako me domate, misër apo ullinj, rekomandohet që përmbajtjen ta zhvendosni menjëherë në një enë qelqi ose plastike, me mbyllje hermetike.
Sipas Organizatës Italiane të Konsumatorëve dhe Përdoruesve (OCU), është e rëndësishme që ushqimi të ruhet me lëngun e vet konservues. Kjo ndihmon në mbrojtjen e shijes dhe vetive të produktit. Produkti duhet të jetë i zhytur plotësisht në këtë lëng.
Në rast se e dini që do ta konsumoni brenda ditës, mund të përdorni një qese plastike për mbulim, por kjo nuk është zgjidhje afatgjatë, pasi nuk ofron izolim të plotë.
Edhe në kushte të përshtatshme, ushqimet e konservuara të hapura nuk duhet të qëndrojnë më shumë se 3-4 ditë në frigorifer. Më pas, rreziku i prishjes dhe kontaminimit rritet ndjeshëm. Nëse vini re ndonjë ndryshim në ngjyrë, erë apo shije mos e konsumoni.
