Klubi i Liverpoolit ka njoftuar zyrtarisht se fanella me numrin 20, e mbajtur nga sulmuesi Diogo Jota, do të tërhiqet përfundimisht dhe do të mbetet pjesë e përjetshme e historisë së klubit. Ky vendim prekës vjen pas vdekjes tragjike të futbollistit portugez, i cili humbi jetën në një aksident automobilistik në Spanjë.
Në njoftimin e publikuar në faqen zyrtare të klubit, Liverpool shpreh dhimbjen e thellë për humbjen e një prej yjeve të skuadrës dhe thekson se kontributi i Jotës në sukseset e fundit do të mbahet mend gjithmonë me respekt dhe krenari.
“Numri 20, me të drejtë, do të mbahet mend përgjithmonë për kontributin e Diogo Jotës në fitimin e titullit historik të 20-të të kampionatit nga Liverpool në sezonin 2024/25 – veçanërisht falë driblimit të tij të paharrueshëm dhe golit të shënuar para tribunës ‘Kop’, i cili siguroi fitoren në derbin e prillit ndaj Evertonit. Ai gol ishte i fundit në karrierën e tij,” thuhet në deklaratën zyrtare të klubit.
Jota, i njohur për teknikën dhe shpirtin luftarak në fushë, ishte kthyer në një figurë të dashur për tifozët e Liverpoolit që nga ardhja e tij në klub në vitin 2020. Lajmi për vdekjen e tij ka tronditur komunitetin futbollistik, ndërsa klube, lojtarë dhe tifozë nga mbarë bota kanë shprehur ngushëllimet e tyre.
Liverpool ka paralajmëruar gjithashtu se do të organizojë një ceremoni përkujtimore në nder të sulmuesit gjatë ndeshjes së ardhshme në Anfield.
