Kryeministri Edi Rama ka lëshuar një paralajmërim të ashpër për të gjithë ata që kanë uzurpuar hapësirat publike në qytetet e mëdha të vendit. Në një takim të zhvilluar me deputetët e Tiranës dhe përfaqësues të pushtetit vendor, Rama bëri të ditur se në mesin e korrikut do të nisë një aksion i gjerë për lirimin e hapësirave publike – veçanërisht atyre të zëna në mënyrë të paligjshme nga trarët, tendat apo struktura të tjera abuzive.
Ultimatum dyjavor për zaptuesit: “Hiqni vetë pengesat”
“Boll është boll,” theksoi kryeministri, duke bërë thirrje të qartë për të gjithë ata që kanë zaptuar trotuare, rrugë apo hapësira ndërmjet pallateve: të largojnë vetë pengesat brenda dy javësh, përndryshe do të përballen me pasojat ligjore.
“Do të ketë gjoba dhe ndjekje penale për krim mjedisor dhe për zaptim e shkatërrim të pronës publike,” paralajmëroi Rama, duke e cilësuar këtë situatë si “të papranueshme dhe të padurueshme”.
Në shënjestër: parkimet private, tendat dhe mushamatë e lokaleve
Kryeministri u ndal veçanërisht te fenomeni i trarëve që vendosen për parkim përreth pallateve, të cilat, sipas tij, shpesh trajtohen si pronë private nga ndërtuesit dhe banorët, kur në të vërtetë janë pronë publike apo pjesë e përbashkët e komunitetit.
“Askush nuk ka më shumë të drejtë mbi tokën përreth pallatit sesa çdo banor i atij komuniteti,” deklaroi ai.
Po ashtu, ai kritikoi edhe lokalet që kanë zënë trotuaret me tenda, mushama dhe zona të mbyllura ku lejohet pirja e duhanit, duke e konsideruar këtë një formë uzurpimi që ndikon drejtpërdrejt në cilësinë e jetës urbane.
“Do ta ngremë vendin në hava” – mobilizimi për pastrimin urban
Rama u shpreh se do të ndërmerren veprime të forta në javët e ardhshme, ku do të përfshihen strukturat e Inspektoratit të Mbrojtjes së Territorit (IMT), policia bashkiake dhe Policia e Shtetit. Deputetët do të zbresin në terren për të evidentuar rastet e zaptimit dhe për të raportuar situatat problematike.
“Do të ngremë vendin në hava – njësoj siç amvisat bëjnë pastrimin e përgjithshëm të shtëpisë. Nuk do të ketë më ‘tokë të xanun’,” deklaroi Rama me tone të vendosura.
Lirimi nis nga Vlora, vijon në Durrës dhe qarqet e tjera
Aksioni ka nisur simbolikisht në lagjen historike Muradie në Vlorë, ku policia bashkiake ka ndërhyrë për të liruar hapësirat publike të zëna në mënyrë të paligjshme. Kryeministri ka paralajmëruar se aksione të ngjashme do të ndërmerren edhe në Tiranë, Durrës dhe qytete të tjera në ditët në vijim.
Mesazh për deputetët: “Zgjohuni një orë më herët”
Në fund, Rama u drejtua edhe deputetëve të mazhorancës, duke i kërkuar më shumë angazhim në terren dhe pjesëmarrje aktive në evidentimin e problematikave urbane.
“83 mandatet nuk janë arsye për të fjetur. Zgjohuni një orë më herët dhe dilni në terren. Ky vend ka nevojë për përgjegjësi,” tha kryeministri.
Aksioni për lirimin e hapësirave publike pritet të jetë një ndër fushatat më të forta të qeverisë këtë verë, me synimin për të rikthyer qytetin te qytetari – dhe jo te zaptuesit.
