Sot, me fillim nga ora 11:00, Kuvendi i Kosovës do të tentojë për herë të 42-të të konstituohet, por pritjet për një zhvillim të rëndësishëm mbeten të ulëta, për shkak të bllokadës së vazhdueshme politike.
Në seancën e fundit të mbajtur të enjten, përpjekjet për arritjen e një marrëveshjeje mes partive politike sërish kanë dështuar, duke e lënë institucionin më të lartë legjislativ të vendit në gjendje të pafunksionale.
Përplasjet më të mëdha vazhdojnë të vijnë rreth refuzimit të Lëvizjes Vetëvendosje për të zbatuar Aktgjykimin e Gjykatës Kushtetuese, e cila kërkon krijimin e Komisionit për votimin e fshehtë të kryetarit të Kuvendit – një hap i domosdoshëm për funksionalizimin e legjislaturës së re. Ky është tashmë rasti i tretë me radhë që Vetëvendosje injoron vendimin e Kushtetueses, duke nxitur kritika të ashpra nga opozita dhe shoqëria civile.
Kriza institucionale ka lënë vendin pa Kuvend funksional që nga mbajtja e zgjedhjeve të parakohshme parlamentare, duke ndikuar negativisht në miratimin e ligjeve, funksionimin e qeverisë dhe zhvillimin demokratik të vendit.
Përkundër thirrjeve të shumta për zgjidhje dhe respektim të vendimeve të gjykatave, ngërçi politik vazhdon të thellohet. Kjo situatë ka shtuar shqetësimet për përshkallëzim të krizës, nëse palët politike nuk arrijnë të bien dakord për hapat e mëtejmë institucionalë.
