Udhëheqësi Suprem i Iranit, Ajatollah Ali Khamenei, u shfaq publikisht për herë të parë këtë të shtunë që nga fillimi i luftës 12-ditore midis Iranit dhe Izraelit, duke marrë pjesë në një ceremoni fetare në Teheran.
Sipas agjencisë Associated Press (AP), paraqitja e Khameneit vjen pas një periudhe të gjatë mungese nga syri i publikut, gjë që kishte ngritur spekulime se udhëheqësi 85-vjeçar mund të ishte izoluar në një bunker të sigurisë së lartë, për shkak të përshkallëzimit të konfliktit me Izraelin. Megjithatë, këto zëra nuk janë konfirmuar nga media shtetërore iraniane.
Në pamjet e transmetuara nga televizioni shtetëror iranian, Ajatollah Khamenei shihet duke përshëndetur turmën e pranishme dhe përkulur kokën, ndërsa hynte në një xhami pranë rezidencës së tij zyrtare në Teheran. Turma e pjesëmarrësve u ngrit në këmbë në shenjë respekti.
Në ceremoni ishin të pranishëm edhe zyrtarë të lartë të shtetit iranian, përfshirë kryetarin e parlamentit, ndërsa masat e sigurisë ishin jashtëzakonisht të rrepta – një praktikë e zakonshme për eventet me praninë e liderit suprem.
Khamenei, i cili ka fjalën e fundit në të gjitha çështjet shtetërore të Iranit, nuk mbajti ndonjë deklaratë publike gjatë paraqitjes, të paktën jo deri në momentin e publikimit të këtij raportimi.
Paraqitja publike e tij shihet si një përpjekje për të treguar qëndrueshmëri dhe kontroll, në një kohë kur tensionet me Izraelin mbeten të larta dhe situata rajonale është e brishtë.
Burimi: Associated Press (AP)
