Me rastin e 27-vjetorit të betejës së Loxhës, një nga përballjet më të ashpra të luftës së UÇK-së, ish-kryeministri Ramush Haradinaj ka kujtuar me nderim të veçantë luftëtarët që dhanë jetën për lirinë e Kosovës.
Në një postim të bërë në rrjetet sociale, Haradinaj ka përshkruar betejën e zhvilluar më 6 korrik 1998 si një ndër më të fuqishmet që janë zhvilluar kundër forcave armike, ku djemtë e Loxhës dhe fshatrave përreth luftuan deri në vetëflijim për të mbrojtur atdheun.
“Duke kujtuar sot përpjekjet e paepura të luftëtarëve dhe vullnetin e madh për çlirim, nderojmë kontributin e Loxhës në kohën më të lavdishme të historisë sonë të re”, – ka shkruar Haradinaj.
Ai ka përmendur me respekt të veçantë dëshmorët Tahir Shala, Rrustem Bruqi, Enver Alaj, Lumni Surdulli dhe Xhavit Qufaj, të cilët ranë në këtë betejë, duke u përjetësuar në themelet e lirisë.
Po ashtu, janë përkujtuar luftëtarët e fshatit Rudicë – Nimon Bajraktari, Haki Ahmetxhekaj dhe Bashkim Mehmetaj, që ranë gjatë përpjekjes për të sjellë armët e lirisë, si dhe bashkëluftëtari Arsen Mazrekaj, i cili humbi jetën në të njëjtën ditë.
“Nderim i përjetshëm për të gjithë luftëtarët e lirisë!” – ka përfunduar Haradinaj mesazhin e tij.
Beteja e Loxhës mbetet një simbol i qëndresës dhe guximit në luftën për çlirim, ndërsa 6 korriku është kthyer në një datë kujtese dhe nderimi për ata që flijuan gjithçka për lirinë e vendit.
