Shtetet e Bashkuara janë në prag të përmbylljes së disa marrëveshjeve të rëndësishme tregtare, vetëm pak ditë para hyrjes në fuqi të tarifave të reja për importet më 9 korrik. Lajmi është konfirmuar nga Sekretari amerikan i Thesarit, Skott Besent, në një intervistë për emisionin politik “State of the Union” në CNN.
Besent deklaroi se gjatë ditëve në vijim priten njoftime të rëndësishme nga administrata amerikane në lidhje me marrëveshje që synojnë të shmangin përplasjet tregtare dhe të ruajnë balancën ekonomike ndërkombëtare.
“Do të kemi lajme të mëdha shumë shpejt. Ka përparim të konsiderueshëm në disa fronte dhe ne shpresojmë që marrëveshjet të finalizohen para afatit të 9 korrikut,” theksoi ai gjatë intervistës.
Sipas tij, presidenti Donald Trump ka autorizuar dërgimin e letrave paralajmëruese në drejtim të rreth 100 vendeve, me të cilat SHBA aktualisht nuk ka marrëdhënie të konsiderueshme tregtare. Në këto komunikime diplomatike, do të theksohet se tarifat e larta do të rikthehen në fuqi, në rast se nuk arrihet përparim në bisedimet tregtare.
“Presidenti Trump do të dërgojë letra paralajmëruese partnerëve tanë tregtarë. Nëse nuk përmbyllen marrëveshjet, nga data 1 gusht tarifat do të rikthehen në nivelet e vendosura më 2 prill,” paralajmëroi Besent.
Kjo nismë përkon me një strategji më të ashpër tregtare të administratës aktuale, e cila po kërkon rishikimin e marrëdhënieve ekonomike ndërkombëtare në funksion të interesit amerikan, përfshirë reduktimin e deficitit tregtar dhe nxitjen e prodhimit vendor.
Për më tepër, kjo lëvizje vjen në një kohë delikate për tregjet globale, të cilat ndodhen përballë presionit të inflacionit dhe pasigurive gjeopolitike – duke e shtuar peshën e këtyre marrëveshjeve në axhendën ekonomike ndërkombëtare.
