E hëna do të sjellë valë të nxehti të fuqishme në gjithë rajonin e Ballkanit Perëndimor, me temperatura përvëluese dhe mot kryesisht të kthjellët. Sipas parashikimeve meteorologjike, Kosova do të përjetojë një ditë tipike verore, me temperatura që pritet të luhaten nga 17°C në orët e para të mëngjesit deri në 37°C në maksimumin e ditës.
Erërat jugperëndimore do të fillojnë të fuqizohen, duke shtuar ndjesinë e nxehtësisë në shumë zona urbane dhe rurale.
Nxehtësi përvëluese edhe në Shqipëri, Maqedoninë e Veriut dhe rajonin
Në Shqipëri, Maqedoninë e Veriut, Luginën e Preshevës dhe Malin e Zi, e hëna gjithashtu do të karakterizohet nga mot me diell dhe shumë i nxehtë, me temperatura të larta dhe lagështi të konsiderueshme në ajër.
Sipas sinoptikanëve, do të ketë fuqizim gradual të erërave nga drejtimet jugore, jugperëndimore dhe perëndimore, duke sjellë masa të nxehta ajrore nga Mesdheu.
Mundësi për rrebeshe lokale në disa zona
Përkundër motit kryesisht të kthjellët, në disa zona të izoluara në Mal të Zi dhe veriun e thellë të Shqipërisë, pasditja mund të sjellë zhvillime të vranësirave vertikale, të cilat mund të shoqërohen me rrebeshe lokale shiu, vetëtima dhe bubullima.
Meteorologët këshillojnë qytetarët të shmangin ekspozimin në diell gjatë orëve të mesditës, të konsumojnë sa më shumë lëngje dhe të ndjekin njoftimet e fundit për kushtet e motit në zonat e tyre.
