Me afrimin e kulmit të sezonit turistik dhe fluksit të madh të automjeteve në akset rrugore që lidhin Kosovën me Shqipërinë, autoritetet e rendit në të dy vendet kanë paralajmëruar masa të shtuara kontrolli dhe penalizime për shkelësit e rregullave të qarkullimit rrugor.
Sipas Radio Televizionit të Kosovës (RTK), Policia e Kosovës dhe ajo e Shqipërisë do të intensifikojnë kontrollet në terren, përdorimin e radarëve statikë dhe do të zbatojnë masa ndëshkuese për çdo shkelje të evidentuar.
Radarë statikë dhe ndëshkime të menjëhershme
Ismail Fejzullahu, komandant i Trafikut në Autostradë në Policinë e Kosovës, bëri të ditur se do të vendosen radarë statikë përgjatë rrugëve kryesore, të cilët regjistrojnë automatikisht kundërvajtjet dhe i dërgojnë ato direkt në sistemin elektronik të ndëshkimeve.
“Qytetarët kanë filluar ta kuptojnë se ka radarë statikë. Apeloj për kujdes maksimal, sepse incizimet regjistrohen automatikisht dhe kundërvajtjet dokumentohen në sistem”, theksoi Fejzullahu për RTK.
Pagesa e gjobave për shtetasit e huaj në Shqipëri
Një apel për respektimin e sinjalistikës rrugore ka dhënë edhe Artur Selimaj, shef i Sigurisë Rrugore në Drejtorinë e Përgjithshme të Policisë së Shqipërisë. Ai sqaroi se shtetasit e huaj, përfshirë ata nga Kosova, në rastet kur u ndalohet mjeti për shkelje të rregullave, mund të likuidojnë gjobën menjëherë në vend, duke përfituar 50% ulje nëse pagesa kryhet brenda afatit të parashikuar.
“Kodi Rrugor i Republikës së Shqipërisë parashikon që, për të shmangur bllokimin administrativ të mjetit, gjobat mund të paguhen në vend. Nëse bëhet pagesa menjëherë, aplikohen reduktime sipas ligjit”, deklaroi Selimaj për RTK.
Bashkëpunim i afërt për sigurinë në trafik
Autoritetet policore të të dy vendeve kanë theksuar se po punojnë ngushtë për garantimin e rendit dhe sigurisë në akset më të frekuentuara rrugore, veçanërisht në drejtim të bregdetit shqiptar gjatë muajve të verës.
Për të shmangur ndëshkime dhe vonesa, udhëtarët nga Kosova dhe më gjerë këshillohen të respektojnë rregullat e qarkullimit dhe sinjalistikën rrugore, si dhe të informohen për legjislacionin përkatës gjatë kalimeve ndërkufitare.
Burimi: RTK – Radio Televizioni i Kosovës
