Presidenti i SHBA-së, Donald Trump, ka nisur zyrtarisht zbatimin e tarifave të reja doganore, duke dërguar letrat e para për shtetet e prekura. Masat e reja përfshijnë tarifa 25% ndaj Japonisë dhe Koresë së Jugut, të shpallura më herët në platformën Truth Social.
Në njoftimin e tij, Trump bëri të ditur se tarifat do të hyjnë në fuqi më 1 gusht 2025, pas përfundimit të një afati pezullimi të mëhershëm, që ishte vendosur për të mundësuar negociatat tregtare.
“Rreth 12 vende të tjera do të marrin letra zyrtare në ditët në vijim”, deklaroi Karoline Leavitt, zëdhënëse e Shtëpisë së Bardhë, pas publikimit të dokumenteve nga vetë Trump.
Tarifa të reja për vende të tjera
Përveç Japonisë dhe Koresë së Jugut, administrata Trump ka njoftuar tarifa 40% ndaj Mianmarit dhe Laosit, ndërsa Afrikës së Jugut do t’i vendosen tarifa 30%, për shkak të, siç pretendohet, “diskriminimit ndaj të bardhëve”.
Reagimi i tregjeve
Vendimi i Trump ka shkaktuar tronditje të menjëhershme në bursat amerikane:
-
Dow Jones ra me 1,01%, në 44.390,37 pikë
-
Nasdaq humbi 0,83%, duke u mbyllur në 20.431,26 pikë
-
S&P 500 pësoi rënie prej 0,81%, në 6.228,84 pikë
Analistët paralajmërojnë se tensionet tregtare mund të ndikojnë negativisht në stabilitetin ekonomik global.
Tarifa edhe ndaj vendeve të BRICS
Presidenti amerikan paralajmëroi tarifa shtesë 10% për çdo shtet që, sipas tij, “rreshtohet me politikat anti-amerikane të BRICS”. Ai deklaroi se “nuk do të ketë përjashtime nga kjo politikë”, duke intensifikuar qasjen konfrontuese me bllokun ekonomik të udhëhequr nga Brazili, Rusia, India, Kina dhe Afrika e Jugut.
Në samitin e BRICS, të mbajtur në Rio de Janeiro, grupi publikoi një deklaratë të përbashkët ku dënohet “rritja e masave të njëanshme doganore dhe jotarifore që shtrembërojnë tregtinë”.
“Këto masa dëmtojnë perspektivën e zhvillimit ekonomik global dhe rrisin pabarazitë ekzistuese”, thuhet në deklaratë.
Reagimi i Kinës
Pekini reagoi menjëherë, duke bërë thirrje për shmangien e përplasjes tregtare me SHBA-në. Zëdhënësi i Ministrisë së Jashtme kineze, Mao Ning, deklaroi se:
“Luftërat tregtare nuk kanë fitues, ndërsa proteksionizmi nuk është zgjidhje”.
Vendet partnere të BRICS
Sipas burimeve zyrtare të BRICS, grupi ka shtuar partnerë si: Bjellorusia, Bolivia, Kuba, Kazakistani, Malajzia, Nigeria, Tajlanda, Uganda dhe Uzbekistani. Po ashtu, Trump ka kërcënuar se do të vendosë tarifa deri në 100% ndaj çdo shteti që mbështet përpjekjet për krijimin e një monedhe të përbashkët në vend të dollarit amerikan.
