E marta në Kosovë pritet të karakterizohet nga mot shumë i nxehtë dhe me kushte të paqëndrueshme atmosferike, ku nuk përjashtohen stuhitë lokale shiu me vetëtima dhe bubullimë.
Sipas parashikimeve të fundit meteorologjike, pjesa e parë e ditës do të jetë kryesisht me diell dhe me zagushi të lartë, ndërsa temperaturat maksimale do të arrijnë deri në 34°C.
Pasdite dhe në orët e mbrëmjes pritet shtim i vranësirave, që në disa zona mund të sjellin shira të rrëmbyeshëm të izoluar, të shoqëruar me vetëtima, bubullimë dhe rrezik për breshër. Stuhitë nuk pritet të përfshijnë gjithë territorin, por do të jenë të shpërndara në mënyrë të lokalizuar.
Po ashtu, parashikohet aktivizim i erërave nga drejtimi i jugut, jugperëndimit dhe juglindjes, me periudha ku mund të fryjnë me intensitet të lartë, duke ndikuar në ndjesinë e vapës dhe në kushtet mikroklimatike në disa rajone.
Institucionet meteorologjike dhe autoritetet përkatëse u bëjnë thirrje qytetarëve të jenë të kujdesshëm gjatë orëve të pasdites, sidomos në zonat që mund të preken nga stuhitë, për shkak të mundësisë së përmbytjeve të menjëhershme dhe dëmeve nga breshëri apo erërat e fuqishme.
