Presidenti amerikan Donald Trump ka bërë të ditur se Shtetet e Bashkuara do të dërgojnë armë shtesë në Ukrainë, duke sinjalizuar një kthesë të papritur në qëndrimin e administratës së tij pas një ndalese të mëparshme të ndihmës ushtarake për Kievin.
“Do të na duhet të dërgojmë më shumë armë në Ukrainë – kryesisht armë mbrojtëse”, deklaroi Trump të hënën para gazetarëve në Shtëpinë e Bardhë, sipas agjencisë franceze të lajmeve AFP. Ai nuk dha hollësi mbi sasinë e armëve, as mbi afatin e dorëzimit të tyre.
Deklarata vjen pas vendimit të fundit të Uashingtonit për pezullimin e disa dërgesave të ndihmës ushtarake, përfshirë municione dhe raketa të avancuara për sistemet Patriot, për shkak të shqetësimeve mbi nivelin e ulët të rezervave ushtarake amerikane.
Dërgesat e pezulluara për sistemet Patriot
Sipas burimeve të mediave amerikane, ndër ndihmat e pezulluara përfshiheshin raketat për sistemet e mbrojtjes ajrore Patriot, të konsideruara si armë kyçe për mbrojtjen e Ukrainës kundër sulmeve me raketa dhe dronë nga Rusia. Ky vendim kishte ngjallur kritika të brendshme dhe shqetësim në Kievin zyrtar.
Trump: “Nuk jam i kënaqur me Putinin”
Në deklaratën e tij, Trump gjithashtu përsëriti se “nuk është i kënaqur” me presidentin rus Vladimir Putin, duke lënë të kuptohet se tensionet mes dy liderëve kanë ardhur në rritje.
Burime nga administrata konfirmuan se Trump ka zhvilluar biseda telefonike të ndara javën e kaluar me Putin dhe presidentin ukrainas Volodymyr Zelensky, por takimet nuk sollën ndonjë përparim konkret drejt përfundimit të luftës.
Ukraina, nën sulm të shtuar rus
Ndërkohë, pas bisedimeve të dështuara, Rusia ka shtuar sulmet ndaj Ukrainës, me dronë dhe raketa, duke shkaktuar dëme të mëdha në infrastrukturë dhe civilë. Situata ka tensionuar më tej klimën ndërkombëtare, me aleatët e NATO-s që kërkojnë rikthim të ndihmës së plotë për Kievin.
Burimi: AFP / Përpunuar nga redaksia
