Një tjetër arritje e jashtëzakonshme për kulturën dhe muzikën kosovare në arenën ndërkombëtare: Orkestra e Fëmijëve “Amadeus” nga Prishtina është nderuar me Çmimin e Argjendtë në edicionin e 11-të të Festivalit Botëror të Orkestrave, mbajtur në kryeqytetin austriak, Vjenë.
Kosova në mesin e më të mirëve të botës
Në një konkurrencë të ashpër ku morën pjesë dhjetëra orkestra nga mbarë globi, “Amadeus” spikati me interpretimin emocionues të veprës “Malësorja” nga kompozitori Lorenc Antoni. Performanca u shoqërua me kostume tradicionale nga të gjitha trevat shqiptare, një detaj që u vlerësua lart nga juria ndërkombëtare, duke e bërë këtë paraqitje artistike të paharrueshme për publikun vjenez dhe më gjerë.
Nga Konzerthaus te Musikverein: Një rrugëtim koncertor që kulmoi me lavdi
Që nga 10 korriku, nën drejtimin e dirigjentit Vehbi Shosholli, orkestra ka performuar në disa nga sallat më prestigjioze të kryeqytetit të muzikës klasike, përfshirë Wiener Konzerthaus, House of Strauss dhe KulturGarage.
Kulmi i prezencës së tyre ishte skena ikonike e Musikverein – Golden Hall, ku gjatë koncertit gala u shpallën edhe fituesit e festivalit, dhe Kosova u ngjit krenarisht në podiumin e suksesit.
Vlerësim dhe krenari për rininë muzikore të Kosovës
Ky sukses shënon jo vetëm një çmim artistik, por edhe një dëshmi të nivelit, përkushtimit dhe talentit që rinia kosovare po arrin në skenën botërore. Ministria e Kulturës, Rinisë dhe Sportit ka reaguar duke shprehur krenari dhe përkushtim për mbështetjen e talenteve të reja që me pasion dhe disiplinë po promovojnë kulturën shqiptare ndërkombëtarisht.
“Kur fëmijët tanë marrin skenën, nuk ka nevojë për fjalë të mëdha – mjafton të dëgjosh duartrokitjet,” – thuhet në reagimin e MKRS-së.
Orkestra “Amadeus” është tashmë një emër i dalluar i muzikës së rinisë në Kosovë dhe ky çmim i rëndësishëm është vetëm një tjetër dëshmi se kultura dhe talenti shqiptar nuk njeh kufij.
