Kryetari i Degës së PDK-së në Lipjan dhe kandidati për kryetar komune, Shukri Buja, ka reaguar publikisht pas një vendimi të Gjykatës Themelore që, sipas tij, është i pabazë dhe i motivuar politikisht.
Në një deklaratë të publikuar në rrjetet sociale, Buja e ka cilësuar vendimin si “qesharak” dhe “të dështuar në nisje”, duke thënë se asgjë nuk do ta ndalë në përpjekjen për të ndryshuar drejtimin që ka marrë Lipjani.
Buja theksoi se vendimi gjyqësor nuk është i formës së prerë, prandaj ai do të vazhdojë betejën ligjore me vendosmëri, duke mos hequr dorë nga kandidatura për zgjedhjet lokale.
“Edhe kur drejtësia merr vendime të padrejta dhe të motivuara politikisht, unë nuk i mohoj, por i sfidoj me dinjitet dhe në rrugë ligjore”, tha ai.
Në deklaratën e tij, Buja përkujtoi të kaluarën e tij politike dhe atdhetare, duke theksuar se ka sakrifikuar rininë në burgjet serbe dhe ka kontribuar në ndërtimin e institucioneve të Kosovës pas luftës.
“U përballa me drejtësinë serbe, me drejtësinë ndërkombëtare dhe me sfida të shumta brenda institucioneve të shtetit tonë për më shumë se dy dekada – dhe nga të gjitha dola i pastër dhe fitimtar.”
Ai ka akuzuar rivalët politikë për përpjekje të pasuksesshme për ta ndalur, duke u zotuar se kjo “betejë e vogël dhe politike” do të përfundojë ashtu siç e meriton:
“Në shportën e mbeturinave historike të vendimeve të padrejta”, përfundoi Buja.
Shukri Buja mbetet kandidat zyrtar i PDK-së për kryetar të Komunës së Lipjanit, duke e cilësuar përpjekjen ligjore kundër tij si një pengesë e përkohshme në rrugën drejt fitores.
