Preshevë, 15 korrik 2025 – Kryetari i Trupit Koordinues të Qeverisë së Serbisë, Aleksandar Martinoviq, së bashku me ushtruesin e detyrës së drejtorit të këtij institucioni, Nenad Mitroviq, ka zhvilluar të martën një vizitë zyrtare në komunën e Preshevës.
Vizita ka nisur me një takim zyrtar me kryetaren e komunës, Ardita Sinani, ndërsa më pas delegacioni ka vizituar zonën industriale në Çukarkë, ku janë diskutuar mundësitë për zhvillim ekonomik lokal dhe për tërheqjen e investimeve në rajon.
Pas takimit, gjatë një konference për media, janë theksuar dallimet politike ndërmjet dy palëve, veçanërisht në lidhje me statusin e Kosovës dhe çështjen e pasivizimit të adresave në komunat me shumicë shqiptare.
Qëndrime të kundërta për Kosovën
Kryetarja Ardita Sinani, gjatë deklaratës së saj, tha se Kosova është një shtet i pavarur dhe sovran dhe se ky realitet duhet të pranohet në komunikimin institucional mes palëve. Ajo kërkoi që çështje të rëndësishme si njohja e diplomave të lëshuara nga institucionet e Kosovës, përfshirja e shqiptarëve në institucionet shtetërore të Serbisë dhe zgjidhja e problemeve praktike të qytetarëve të mos mbeten peng i mospajtimeve politike.
Në anën tjetër, Aleksandar Martinoviq deklaroi se pozicioni i shtetit serb mbetet i pandryshuar dhe se Serbia nuk e njeh pavarësinë e Kosovës. Ai theksoi se diplomat e lëshuara nga Kosova nuk mund të pranohen nëse mbajnë simbolet shtetërore të Republikës së Kosovës, pasi një pranim i tillë do të përbënte njohje të pavarësisë.
Pasivizimi i adresave – shqetësim i vazhdueshëm
Një tjetër temë që u diskutua në takim ishte pasivizimi i adresave të qytetarëve shqiptarë në Preshevë, Bujanoc dhe Medvegjë. Kryetarja Sinani ngriti shqetësimin për ndikimin që ky proces ka në të drejtat themelore të qytetarëve, duke përfshirë të drejtën për të votuar, për të marrë dokumente personale dhe për të pasur akses në shërbime publike.
Martinoviq, nga ana e tij, tha se pasivizimi i adresave është një proces administrativ që zbatohet në të gjithë territorin e Serbisë dhe jo vetëm në komunat me shumicë shqiptare. Ai shtoi se ky nuk është një proces automatik apo i përhershëm, por realizohet mbi bazën e verifikimeve nga Ministria e Punëve të Brendshme. Sipas tij, në rastet kur qytetarët dëshmojnë se jetojnë në adresën e deklaruar, vendbanimi mund të rikthehet përmes procedurave ligjore të parashikuara.
Bashkëpunim në fusha praktike
Pavarësisht mospajtimeve për çështje të rëndësishme politike, të dy palët u shprehën të hapura për bashkëpunim në fusha që ndikojnë drejtpërdrejt në jetën e qytetarëve. Sinani kërkoi rritje të fondeve për zhvillim ekonomik lokal, investime në arsim dhe shëndetësi, si dhe mbështetje për të rinjtë që përballen me papunësi dhe emigrim.
Martinoviq theksoi rëndësinë e bashkëpunimit në projektet e përbashkëta dhe u shpreh i gatshëm të mbështesë përpjekjet për të funksionalizuar zonën industriale në Preshevë dhe për tërheqjen e investitorëve që do të mundësonin hapjen e vendeve të reja të punës.
