Gjykata Supreme e Kosovës ka shpallur të paligjshëm dhe të pavlefshëm udhëzimin administrativ të nënshkruar nga ministri në detyrë i Financave, Hekuran Murati, për pezullimin 60-ditor të shitjes dhe abonimeve të arkave fiskale.
Aktgjykimi u nxor më 7 korrik 2025 nga një kolegj i përbërë prej gjyqtarëve të Gjykatës Supreme, nën kryesimin e gjyqtares Delushe Halimi.
Padia nga operatorët ekonomikë, Gjykata u jep të drejtë
Vendimi i Supremes vjen pas padisë së paraqitur nga kompanitë “Enternet” dhe “Service Global”, që merren me shitjen dhe servisimin e pajisjeve fiskale. Palët paditëse u përfaqësuan në gjykatë nga avokati Virtyt Ibrahimaga.
Në dispozitivin e aktgjykimit, thuhet:
“Aprovohet e themeltë kërkesëpadia e paditësve: Enternet Shpk […] dhe Konsorciumi Service Global […] e paraqitur kundër të paditurës: Ministria e Financave, Punës dhe Transfereve (MFPT)”.
“Shpallet i paligjshëm dhe shfuqizohet Udhëzimi Administrativ (MFPT) nr. 01/2025 për Shfrytëzimin e Pajisjeve Elektronike Fiskale […] i publikuar në Gazetën Zyrtare më datë 16.04.2025”.
Gjykata: Qeveria në dorëheqje s’mund të nxjerrë udhëzime administrative
Në arsyetimin e vendimit, Gjykata Supreme thekson se ministri në detyrë nuk ka kompetencë ligjore për të nxjerrë udhëzime administrative. Po ashtu, u potencua se një qeveri në dorëheqje është e autorizuar të ndërmarrë vetëm aktivitete të domosdoshme, në përputhje me planin vjetor dhe buxhetin, dhe jo të ndërmarrë akte të reja normative si ky udhëzim.
Çfarë parashihte udhëzimi i Muratit?
Udhëzimi administrativ i kontestuar, i nënshkruar më 15 prill 2025, pezullonte përkohësisht detyrimin e bizneseve të reja dhe ekzistuese për të përdorur arka fiskale, duke i lejuar ato që përkohësisht të përdorin paragona fiskalë – një praktikë e aplikuar mes viteve 2006–2010.
Ky udhëzim kishte ngjallur reagime të ashpra nga komuniteti i biznesit dhe shoqëria civile, të cilat e kishin konsideruar si hap pas në sistemin e fiskalizimit dhe të kontrollit të transparencës fiskale.
Ky është një vendim me rëndësi për qartësimin e kufijve të veprimit të një qeverie në dorëheqje, si dhe për garancitë ligjore që duhet të respektohen gjatë administrimit publik në situata të tilla tranzitore.
📌 Burimi: Paparaci.com
