Policia e Kosovës ka njoftuar se ka arrestuar katër persona të dyshuar për disa raste të vjedhjeve që kanë ndodhur në tri lokacione të ndryshme në komunën e Vushtrrisë. Arrestimet u bënë pas hetimeve intensive nga hetuesit e Stacionit Policor në këtë qytet.
Sipas njoftimit zyrtar, të dyshuarit, në bashkëveprim mes tyre, dyshohet se kanë kryer tri raste vjedhjeje, duke shënjestruar materiale ndërtimore, mjete të amvisërisë, një telefon dhe sende të tjera të vlerës.
Një pjesë e sendeve të vjedhura, përfshirë telefonin, janë rikuperuar dhe kthyer tek pronarët legjitimë, ka bërë të ditur policia.
Pas intervistimit, prokurori kompetent ka vendosur që ndaj njërit nga të dyshuarit, person madhor, të caktohet masa e ndalimit policor për 48 orë. Ndërkohë, tre të dyshuarit e tjerë, të mitur, janë liruar në procedurë të rregullt.
Policia ka theksuar se hetimet për rastin po vazhdojnë me qëllim zbardhjen e plotë të veprave dhe identifikimin e mundshëm të ndonjë bashkëpunëtori tjetër.
