Konflikti në Lindjen e Mesme vijon të marrë jetë njerëzish, teksa ushtria izraelite ka ndërmarrë një sërë sulmesh në Rripin e Gazës dhe në territorin e Sirisë. Sipas raportimeve nga korrespondenti i Al Jazeera Arabic, të paktën 56 persona janë vrarë në Gaza që nga agimi i së enjtes, si pasojë e bombardimeve izraelite.
Sulmet vijnë pas reagimeve ndërkombëtare për shënjestrimin e kishës së vetme katolike në Gaza, ku mbetën të vrarë tre persona dhe të paktën 10 të tjerë u plagosën. Ky akt ka shkaktuar dënim të gjerë ndërkombëtar, duke e cilësuar si një sulm ndaj objekteve të kultit dhe civilëve.
Ndërkohë, forcat izraelite kanë ndërmarrë edhe një sulm ajror në autostradën Palmyra–Homs në Siri, duke shënjestruar një konvoj të luftëtarëve beduinë, të cilët sipas Kan News, thuhet se po lëviznin drejt zonës së trazuar të Suwayda-s në jug të vendit.
Raportet e mediave arabe konfirmojnë se luftëtarët kanë arritur në Suwayda në orët e fundit, pavarësisht sulmeve.
Qeveria siriane ka reaguar ashpër, duke dënuar bombardimet izraelite si një shkelje të hapur të sovranitetit të saj, në një kohë kur po zhvillohen përpjekje për të vendosur një armëpushim midis komuniteteve beduine dhe druze në jug të Sirisë.
Nga ana tjetër, Izraeli ka justifikuar veprimet e tij ushtarake në Siri, duke pretenduar se ato janë pjesë e një përpjekjeje për të mbrojtur pakicën druze, e cila jeton në territoret përreth.
Situata mbetet e tensionuar, ndërsa komuniteti ndërkombëtar po shton thirrjet për ndaljen e menjëhershme të dhunës dhe për mbrojtjen e civilëve.
