Njësitet doganore në Aeroportin Ndërkombëtar të Prishtinës kanë zbuluar një rast të tentim-importit të mallrave të padeklaruara, duke parandaluar hyrjen ilegale të pajisjeve elektronike në vend.
Sipas njoftimit zyrtar të Doganës së Kosovës, gjatë një kontrolli të zakonshëm në Aeroport, zyrtarët doganorë kanë identifikuar 15 copë pajisje elektronike të tipit Indoor LED Display, me një vlerë të përgjithshme prej 11,370 euro. Malli dyshohet se është tentuar të futet në territorin e Kosovës pa kaluar nëpër procedurat e rregullta doganore.
Pajisjet janë konfiskuar menjëherë, ndërsa rasti është dërguar në sektorin për kundërvajtje doganore për trajtim të mëtejshëm.
Dogana e Kosovës thekson se mbetet e përkushtuar në luftimin e kontrabandës dhe mbrojtjen e interesave ekonomike të shtetit, duke garantuar që çdo mall që hyn në vend të kalojë nëpër filtrat ligjorë dhe doganorë përkatës.
🔍 “Ky rast është një tjetër dëshmi e përkushtimit tonë për një sistem doganor transparent dhe të sigurt,” thuhet në komunikatën e institucionit.
