Edhe pas 49 tentativave, deputetët e Kuvendit të Kosovës nuk kanë arritur të konstituojnë përbërjen e re të legjislaturës. Seanca e sotme, njëjtë si të mëparshmet, përfundoi pa sukses, duke lënë vendin në një ngërç institucional që rrezikon të përshkallëzohet.
Në seancën e radhës, Lëvizja Vetëvendosje (VV) vazhdoi të mbajë të njëjtën qasje, pavarësisht aktgjykimit të fundit të Gjykatës Supreme, që konstaton pamundësinë e ushtrimit paralel të funksioneve ekzekutive dhe legjislative nga ana e kryeministrit Albin Kurti dhe disa ministrave që njëkohësisht janë zgjedhur edhe deputetë.
Refuzohet zbatimi i aktgjykimeve kushtetuese
Kryesuesi i seancës konstituive, Avni Dehari, edhe kësaj radhe refuzoi zbatimin e vendimit të Gjykatës Kushtetuese që kërkon votim të fshehtë për zgjedhjen e kryetarit të Kuvendit. Ai madje ndërpreu fjalën e përfaqësuesve të PDK-së, LDK-së dhe AAK-së në foltore.
VV propozoi sërish krijimin e një komisioni për organizimin e zgjedhjes së kryetarit të Kuvendit, por nisma e tyre mori vetëm 50 vota, duke dështuar të kalojë pragun e nevojshëm.
Pas këtij dështimi, Dehari mbylli seancën, duke paralajmëruar tentimin e radhës të hënën, më 22 korrik, në ora 11:00.
Opozita flet për shkelje të re kushtetuese
Partitë opozitare – PDK, LDK dhe AAK – kanë akuzuar VV-në dhe drejtuesin e seancës për shkelje të re të Kushtetutës së Kosovës. Përfaqësuesit e PDK-së dhe LDK-së kanë paralajmëruar se do t’i drejtohen sërish Gjykatës Kushtetuese për këtë çështje.
Afati kushtetues po shkon drejt fundit
Aktgjykimi i fundit i Gjykatës Kushtetuese përcakton se Kuvendi duhet të konstituohet brenda 30 ditësh nga seanca e parë, afat i cili skadon më 26 korrik. Deri më tani, janë bërë 49 përpjekje të pasuksesshme, ndërsa mbesin edhe tri tentativa të mundshme brenda afatit.
Megjithatë, Kushtetuesja nuk ka sqaruar qartë pasojat juridike, nëse ky afat skadon pa konstituim të Kuvendit.
Presidentja Osmani përgatit lëndë të re për Kushtetuese
Presidentja e Republikës së Kosovës, Vjosa Osmani, pas kthimit nga vizita në SHBA, deklaroi se është në proces të përgatitjes së një lënde të re për Gjykatën Kushtetuese.
“Nëse edhe këtë vikend nuk arrihet marrëveshje dhe nuk ka institucione funksionale, në fillim të javës do t’i drejtohemi Gjykatës Kushtetuese për të kërkuar sqarim se pse afati 30-ditor është i detyrueshëm dhe cilat janë pasojat në rast të mosrespektimit,” – deklaroi Osmani.
Vendimi i Gjykatës Kushtetuese që pritet nga presidentja mund të jetë vendimtar për të sqaruar hapat e ardhshëm kushtetues, nëse Kuvendi dështojnë të konstituohet deri më 26 korrik.
