Gjermania dhe Britania e Madhe kanë nënshkruar zyrtarisht një Traktat Miqësie, duke vendosur një kuadër të ri për bashkëpunim më të ngushtë në fusha kyçe si siguria, tregtia, politika e jashtme dhe migracioni. Marrëveshja prej 27 faqesh u firmos nga kancelari gjerman Friedrich Merz dhe kryeministri britanik Keir Starmer, në një përpjekje për të rindërtuar marrëdhëniet pas largimit të Mbretërisë së Bashkuar nga Bashkimi Evropian (Brexit).
Sipas Deutsche Welle (DW), traktati synon të rrisë stabilitetin dhe prosperitetin në të dy vendet dhe përtej tyre, në kontekstin e sfidave të reja gjeopolitike.
Pikat kyçe të Traktatit të Miqësisë:
1. Siguria dhe mbrojtja e ndërsjellë
Traktati parasheh bashkëpunim të thelluar ushtarak, duke përfshirë një klauzolë ndihme reciproke që plotëson Nenin 5 të NATO-s. Marrëveshja përcakton se “nuk ka kërcënim strategjik për njërën palë që nuk është edhe për tjetrën”, duke përfshirë edhe sigurinë kibernetike si prioritet.
2. Bashkëpunimi në zhvillimin e armëve
Të dyja vendet bien dakord të bashkëpunojnë në krijimin e një rakete me rreze veprimi mbi 2,000 km, si dhe në zhvillimin e dronëve, automjeteve të blinduara dhe pajisjeve të tjera mbrojtëse. Po ashtu, do të lehtësohet eksporti i armëve të prodhuara bashkërisht, një çështje që më parë ka qenë problematike për shkak të kufizimeve gjermane.
3. Mbështetja për Ukrainën
Traktati riafirmon përkushtimin e përbashkët për të ndihmuar Ukrainën si në aspektin ushtarak ashtu edhe në rindërtimin pas luftës.
4. Përfshirja në Ballkanin Perëndimor
Britania shpreh gatishmëri për të marrë pjesë më aktive në Procesin e Berlinit, duke mbështetur afrimin e Ballkanit Perëndimor me Bashkimin Evropian përmes bashkëpunimit rajonal të zgjeruar.
5. Politika e migracionit
Palët do të hartojnë një plan veprimi për luftimin e migracionit ilegal dhe trafikimit të qenieve njerëzore. Përfshihen masa për mbështetje ligjore reciproke, ndjekje penale dhe forcim të kontrollit kufitar.
6. Udhëtimi dhe shkëmbimet kulturore
Marrëveshja synon të lehtësojë udhëtimin pa viza për grupet shkollore deri në fund të vitit. Gjithashtu, që nga gushti, britanikët do të mund të përdorin “E-Gates” në aeroportet gjermane, duke reduktuar pritjet në kufi.
7. Bashkëpunimi ekonomik dhe teknologjik
U ra dakord për krijimin e një forumi ekonomik dypalësh, me theks në teknologjinë e lartë, financat dhe inovacionin. Fokusi do të jetë në investime të përbashkëta dhe zhvillimin e sektorëve strategjikë.
8. Energjetika dhe klima
Gjermania dhe Britania planifikojnë të bashkëpunojnë në ndërtimin e infrastrukturës për furnizimin me energji të rinovueshme nga Deti i Veriut, si dhe në projektet për hidrogjenin dhe kapjen e CO₂.
9. Lidhja hekurudhore direkte
Brenda një dekade, vendet synojnë të krijojnë një linjë direkte hekurudhore nën Kanalin Anglez, duke eliminuar nevojën për transferime për shkak të kontrollit të pasaportave.
