Qeveria e Maqedonisë së Veriut ka ftuar zyrtarisht Bullgarinë që të dorëzojnë së bashku një rezolutë në Parlamentin Evropian, përmes së cilës do të konfirmohej qartazi identiteti dhe gjuha maqedonase. Ftesa është bërë me arsyetimin se, nëse përfshirja e bullgarëve në Kushtetutën maqedonase është e vetmja pengesë për Sofjen, atëherë kjo rezolutë mund të shërbejë si zhbllokim i procesit integrues.
Nënkryetari i Parlamentit të Maqedonisë së Veriut, Antonio Milloshovski, tha se oferta është e hapur dhe konkrete, duke theksuar se një veprim i tillë i përbashkët me Bullgarinë do të përshpejtonte rrugën e vendit drejt BE-së.
“Rezoluta e përbashkët në PE do ta zgjidhte problemin dhe do ta përforconte bashkëpunimin ndërfqinjës. Por kemi rezerva nëse Bullgaria zyrtare do ta pranojë këtë iniciativë,” – deklaroi Milloshovski, duke shtuar se nga pala bullgare ka sinjale të qëllimeve të tjera, që përfshijnë kërkesa të reja të vazhdueshme ndaj Shkupit.
Ai akuzoi gjithashtu disa përfaqësues të LSDM-së për bashkëpunim me qarqe bullgare që, sipas tij, po synojnë pengimin e proceseve eurointegruese.
Nga ana tjetër, presidenti bullgar Rumen Radev ka theksuar se kontesti nuk do të ekzistonte nëse Maqedonia do t’i respektonte të drejtat e bullgarëve që jetojnë në këtë vend, duke përmendur edhe njëherë obligimet e marra në vitin 2022.
Për kryeministrin Hristijan Mickoski, megjithatë, miratimi i rezolutës do të ishte zgjidhje reale e një problemi të stërzgjatur që ka penguar përparimin e Maqedonisë drejt anëtarësimit në Bashkimin Evropian.
Ndërkohë, VMRO-DPMNE ka reaguar ndaj pretendimeve të një media bullgare, sipas së cilës Mickoski kishte aplikuar për pasaportë bullgare në vitin 2008, por më pas kishte hequr dorë. Partia e ka cilësuar këtë si propagandë që synon të diskreditojë liderin e saj dhe të dobësojë pozicionet e Maqedonisë në raport me BE-në.
Fati i propozimit për rezolutë mbetet ende i paqartë, ndërsa palët vazhdojnë qëndrimet e tyre kontradiktore për zgjidhjen e kontestit të identitetit dhe integrimit evropian të Shkupit.
