Policia e Kosovës ka bërë të ditur se ka arrestuar dy persona të dyshuar për një rast të vjedhjes së rëndë, i raportuar më herët gjatë ditës në një kioskë në rrugën “Kral Petri”.
Sipas njoftimit zyrtar, persona të panjohur kishin hyrë me forcë në objektin afarist, duke marrë boksa me cigare dhe një shumë të konsiderueshme parash të gatshme. Vlera e përgjithshme e dëmit, sipas ankuesit, arrin në rreth 4,700 euro.
Falë një pune të shpejtë operative dhe hetimore, njësitet policore të Stacionit në Mitrovicë të Veriut arritën që brenda një kohe të shkurtër të identifikojnë dhe arrestojnë dy të dyshuar:
-
E.H., 44 vjeç (mashkull)
-
S.M., 39 vjeç (femër)
Gjatë kontrollit në lokacionin ku ndodheshin të dyshuarit, policia ka sekuestruar 141 pako me cigare, që dyshohet se janë të vjedhura nga vendi i ngjarjes.
Pas arrestimit, të dyshuarit janë intervistuar nga hetuesit policorë dhe, me vendim të Prokurorit të Shtetit, ndaj tyre është caktuar masa e ndalimit prej 48 orësh. Ndërkohë, ndaj të njëjtëve është iniciuar procedurë penale për veprën “Vjedhje e rëndë”.
Policia e Kosovës thekson përkushtimin e saj për ruajtjen e rendit dhe ligjit, duke theksuar se askush që cënon sigurinë publike nuk do të mbetet pa u ndëshkuar.
