Deputetët e zgjedhur të Kuvendit të Kosovës do të mblidhen sot në orën 11:00, në tentimin e 50-të radhazi për ta konstituuar legjislaturën e nëntë, të dalë nga zgjedhjet e 9 shkurtit. Pavarësisht përpjekjeve të shumta, bllokada politike vazhdon të mbajë peng procesin e zgjedhjes së kryetarit të Kuvendit.
Në seancën e fundit, të mbajtur të shtunën, Kuvendi nuk arriti të bëjë asnjë hap përpara. Kryesuesi i përkohshëm, Avni Dehari, kërkoi nga subjektet politike që të propozojnë anëtarët e Komisionit për votimin e fshehtë, por kjo kërkesë u injorua plotësisht. Vetëm 50 nga 90 deputetët e pranishëm morën pjesë në votim, pa vota kundër apo abstenime, ndërsa pjesa tjetër refuzoi të përfshihej në proces.
Situata e krijuar ka bërë që, katër muaj pas zgjedhjeve, Kuvendi të mbetet i paralizuar dhe i paaftë të funksionojë normalisht, për shkak të mungesës së një marrëveshjeje politike për emrin e kryetarit.
Zgjidhja e ngërçit mbetet ende e pasigurt, ndërsa qytetarët vazhdojnë të presin krijimin e institucioneve të reja që do t’i përgjigjen sfidave politike, ekonomike dhe shoqërore të vendit.
