Prokuroria Themelore në Gjakovë, përmes Departamentit të Përgjithshëm, ka paraqitur kërkesë në Gjykatën Themelore të Gjakovës për caktimin e masës së paraburgimit prej 30 ditësh ndaj dy të pandehurve me inicialet Xh.P. dhe A.M., lidhur me vdekjen e dy punëtorëve të ndërtimtarisë gjatë detyrës.
Sipas aktvendimit për fillimin e hetimeve, të pandehurit Xh.P., si përfaqësues i subjektit afarist NTSH “Sh…”, dhe A.M., si përfaqësues i “M.G.” Sh.P.K., dyshohen se nuk kanë siguruar masat e duhura mbrojtëse në vendin e punës, duke vepruar në kundërshtim me ligjin për sigurinë dhe shëndetin në punë (Ligji nr. 04/L-161). Si pasojë e kësaj neglizhence, më 21 korrik 2025, rreth orës 08:16 në rrugën “Bardhyl Qaushi” në Gjakovë, dy punëtorët H.J. dhe D.B. humbën jetën pasi ranë nga kati i tretë i një objekti në ndërtim.
Sipas hetimeve paraprake, në momentin e aksidentit punëtorët nuk ishin të pajisur me jelekë dhe helmeta mbrojtëse, mungonin pajisjet për siguri si litarët dhe parmakët, si dhe nuk ishin vendosur skelet mbrojtëse në zonën e punimeve. Gjatë punës në ndërtim, një dërrasë shkelëse, e vendosur jashtë kushteve teknike, është thyer, duke i rrëzuar të ndjerët nga një lartësi prej nëntë metrash. Vdekja e tyre është konstatuar nga raporti mjekësor i Spitalit Rajonal të Gjakovës.
Të dy të dyshuarit akuzohen për veprën penale “Asgjësimi, dëmtimi ose heqja e pajisjeve mbrojtëse dhe rrezikimi i sigurisë në vendin e punës”, bazuar në nenin 358 paragrafi 7 në lidhje me paragrafët 2 dhe 3 të Kodit Penal të Republikës së Kosovës.
Prokuroria ka theksuar se ekziston dyshimi i bazuar se veprimet e të pandehurve kanë qenë rezultat i pakujdesisë dhe shkeljes së detyrimeve ligjore, të cilat kanë çuar në pasojat tragjike.
Hetimet janë në vazhdim.
