Përmes një reagimi zyrtar, Presidentja Osmani theksoi se kërkesa para Gjykatës Kushtetuese ka për qëllim shmangien e pasojave të pariparueshme për demokracinë dhe stabilitetin institucional të vendit.
“Në këtë moment vendimtar për demokracinë dhe stabilitetin e Republikës sonë, i bëj sërish thirrje të gjitha subjekteve politike që t’u japin qytetarëve atë që u takon me Kushtetutë: një Kuvend funksional dhe institucione që punojnë në interes të tyre”, ka deklaruar Osmani.
Presidentja potencoi se kërkesa nuk është një vendim i motivuar politikisht, por një obligim kushtetues dhe moral ndaj qytetarëve që kanë votuar për institucione efikase dhe funksionale.
“Kjo nuk është zgjedhje politike, por një detyrim që buron nga përgjegjësia ndaj Kushtetutës dhe interesit të vendit”, theksoi ajo.
Osmani u shpreh se në situata të tilla kritike, Kushtetuta dhe interesi i shtetit duhet të qëndrojnë mbi çdo llogari politike.
Ky veprim vjen në kohën kur vendi po përballet me një ngërç institucional dhe përplasje ndërmjet subjekteve politike lidhur me funksionalitetin e Kuvendit dhe krijimin e institucioneve të reja pas zgjedhjeve. Gjykata Kushtetuese pritet të japë vendimin në ditët në vijim.
