Deputetët e zgjedhur të Kuvendit të Kosovës do të mblidhen sot për herë të 52-të në përpjekje për të konstituar legjislaturën e nëntë, të dalë nga zgjedhjet parlamentare të 9 shkurtit. Seanca pritet të nisë në orën 11:00 dhe do të zhvillohet nën vëzhgimin e afërt të komunitetit ndërkombëtar, përfshirë ambasadorë të akredituar në Kosovë.
Ambasada Gjermane në Kosovë ka konfirmuar pjesëmarrjen e ambasadorit Rohde, së bashku me përfaqësues të tjerë diplomatikë, duke theksuar se kjo është “mundësia e fundit për konstituimin e Kuvendit para afatit të përcaktuar nga Gjykata Kushtetuese”.
Vazhdimi i fundit i seancës, i mbajtur të mërkurën, rezultoi i pasuksesshëm. Nuk u hodh fare në votim formimi i komisionit për votim të fshehtë, për shkak të përplasjeve verbale mes kryesuesit Avni Dehari dhe deputetes së PDK-së, Ganimete Musliu. Incidenti përfshiu ndërprerje të fjalës, tensione të hapura dhe një përfundim të parakohshëm të seancës pa vendime konkrete.
Ndërkohë, situata është komplikuar edhe më tej me ndërhyrjen e Gjykatës Kushtetuese, e cila më 27 korrik ka vendosur masë të përkohshme ex officio, duke ndaluar çdo veprim apo vendim të Kuvendit pas përfundimit të afatit 30-ditor për konstituimin e tij.
Në arsyetimin e saj, Kushtetuesja paralajmëron se çdo veprim i ndërmarrë nga 27 korriku deri më 8 gusht mund të cenojë rendin kushtetues dhe funksionimin institucional të shtetit. “Prandaj, ndalimi i çdo vendimi dhe veprimi nga ana e deputetëve të zgjedhur është në interes publik, i domosdoshëm për ruajtjen e rendit kushtetues dhe interesin më të mirë të Republikës së Kosovës dhe qytetarëve të saj”, thuhet në vendim.
Vendimi është i lidhur me një rast të dorëzuar nga deputetë të LDK-së dhe PDK-së, të cilët kontestojnë vendimin për votimin e komisionit për votim të fshehtë në seancën e 29 qershorit. Megjithatë, masa e përkohshme është vendosur nga vetë Gjykata, pa kërkesë nga palët.
Në këtë sfond institucional të tensionuar dhe me afatin kushtetues që po afrohet me shpejtësi, mbetet të shihet nëse përpjekja e 52-të do të rezultojë me konstituimin e Kuvendit apo do të jetë një tjetër seancë pa përfundim, nën hijen e ndërhyrjes kushtetuese dhe vëzhgimit ndërkombëtar.
