Presidenti francez Emmanuel Macron ka njoftuar se Franca do ta njohë zyrtarisht shtetin e Palestinës në muajin shtator. Ky veprim ka ngjallur reagime të menjëhershme në arenën ndërkombëtare, përfshirë SHBA-në dhe Izraelin, ndërsa është mirëpritur nga Hamasi, i cili e konsideron një hap drejt drejtësisë për popullin palestinez.
Sekretari amerikan i Shtetit, Marco Rubio, e cilësoi vendimin francez si “të pamatur dhe të dëmshëm për procesin e paqes”. Sipas tij, ky hap i shërben vetëm propagandës së Hamasit dhe nënvlerëson viktimat e sulmit të 7 tetorit në Izrael.
“Shtetet e Bashkuara e kundërshtojnë me forcë planin e Emmanuel Macron për të njohur një shtet palestinez në Asamblenë e Përgjithshme të OKB-së. Ky vendim është një shuplakë në fytyrë për viktimat e terrorit”, deklaroi Rubio.
Në të njëjtën linjë reagoi edhe kryeministri izraelit Benjamin Netanyahu, i cili tha se njohja e një shteti palestinez “shpërblen terrorizmin” dhe se një vendim i tillë përbën një kërcënim ekzistencial për Izraelin.
“Një shtet palestinez në këto kushte do të ishte një trampolinë për shfarosjen e Izraelit, jo një mjet për paqe”, u shpreh Netanyahu.
Ministri izraelit i Mbrojtjes, Israel Katz, shtoi se Izraeli nuk do të lejojë krijimin e një entiteti që rrezikon sigurinë dhe ekzistencën e tij.
Ndërkohë, Hamasi përshëndeti vendimin e Francës si një hap historik dhe pozitiv në drejtim të njohjes së të drejtave legjitime të popullit palestinez për vetëvendosje.
“Ky është një akt i drejtësisë për popullin tonë të shtypur. U bëjmë thirrje edhe vendeve të tjera, sidomos atyre evropiane, që ende nuk e kanë njohur Palestinën, të ndjekin shembullin e Francës”, thuhet në deklaratën e Hamasit.
Vendimi i Francës pritet të ndikojë dukshëm në skenën diplomatike globale dhe në zhvillimet e ardhshme të çështjes izraelito-palestineze. Shtatori do të jetë një muaj kyç në përcaktimin e qasjes ndërkombëtare ndaj krijimit të një shteti palestinez.
