Tensionet e ashpra mes Tajlandës dhe Kamboxhias janë kthyer në përplasje të dhunshme ushtarake përgjatë kufirit të diskutueshëm mes dy vendeve, duke shkaktuar deri tani 16 viktima dhe zhvendosjen e mbi 120,000 civilëve.
Sipas autoriteteve, 15 persona janë vrarë në Tajlandë – përfshirë 14 civilë dhe një ushtar – ndërsa një viktimë është raportuar në Kamboxhia. Përplasjet, që kanë hyrë në ditën e dytë, janë më të përgjakshmet në rajon në mbi një dekadë, me përdorim të artilerisë së rëndë dhe raketave me rreze të gjatë nga të dyja palët.
Kryeministri në detyrë i Tajlandës, Phumtham Wechayachai, paralajmëroi se situata mund të përshkallëzohet në një luftë të hapur, duke deklaruar për mediat: “Përleshjet janë gjithnjë e më të rënda dhe përfshijnë armë të fuqishme. Rreziku është real”.
Përhapje e dhunës dhe pasoja në njerëz
Sipas ushtrisë tajlandeze, përleshjet janë shtrirë në 12 pika përgjatë kufirit, nga gjashtë sa ishin raportuar një ditë më parë, duke treguar zgjerimin e konfliktit. Në total, janë plagosur mbi 45 persona në Tajlandë, përfshirë civilë dhe ushtarë, ndërsa së paku 5 të plagosur raportohen në Kamboxhi.
Tajlanda ka zhvendosur rreth 100,672 persona nga katër provinca kufitare – kryesisht nga Surini, Sisaketi, Burirami dhe Ubon Ratchathani – në më shumë se 300 qendra emergjente. Nga ana tjetër, rreth 20,000 banorë kamboxhianë janë evakuuar nga zona veriore e provincës Preah Vihear, sipas “Khmer Times”.
Tempulli i Preah Vihear, në shënjestër të granatimeve
Ministria e Kulturës e Kamboxhias ka raportuar për dëme të konsiderueshme në tempullin e Preah Vihear, një sit i Trashëgimisë Botërore të UNESCO-s, si pasojë e bombardimeve të Tajlandës. Ushtria kamboxhiane ka akuzuar Tajlandën për përdorimin e municioneve thërrmuese, të ndaluara ndërkombëtarisht.
Reagime ndërkombëtare dhe thirrje për ndërprerje të luftimeve
Këshilli i Sigurimit i OKB-së pritet të mbajë një mbledhje urgjente, ndërkohë që thirrjet për qetësi janë shtuar nga aktorë rajonalë dhe globalë. SHBA, një aleat i vjetër i Tajlandës, ka kërkuar ndërprerjen e menjëhershme të armiqësive, ndërsa Kina, që ka marrëdhënie të ngushta me Kamboxhian, ka shprehur shqetësim të thellë, duke kërkuar zgjidhje përmes dialogut.
Sipas burimeve të “Al Jazeera”, që raportojnë nga kufiri, përpjekjet për të menaxhuar situatën humanitare janë të vështira, për shkak të numrit të madh të të zhvendosurve dhe terrenit të pasigurt.
Konflikti rreth kufirit të vjetër
Përleshjet kanë shpërthyer në një zonë të kontestuar përgjatë kufirit, i cili ka qenë historikisht burim mosmarrëveshjesh, veçanërisht rreth tempullit të Preah Vihear, për të cilin vendimi i GJND-së në vitin 1962 nuk i dha fund tensioneve.
Të dyja palët akuzojnë njëra-tjetrën për fillimin e armiqësive, ndërsa situata në terren mbetet e tensionuar dhe me potencial të madh për përshkallëzim të mëtejshëm.
