Kosova do të përballet me ditën më të nxehtë të kësaj jave, me temperatura që pritet të arrijnë kulmin këtë të shtunë. Sipas parashikimeve të fundit meteorologjike, moti do të jetë me diell dhe jashtëzakonisht i nxehtë në të gjithë territorin, ndërsa temperaturat maksimale do të prekin shifrën e 40°C në shumë rajone.
Disa modele klimatike që parashikojnë skenarë më ekstremë, sugjerojnë se në disa zona të vendit, nën hije, termometri mund të ngjitet deri në 43°C – një nivel ky që përbën kërcënim serioz për shëndetin publik dhe infrastrukturën.
Gjatë pasdites, në disa vise kodrinore-malore parashikohen zhvillime të vranësirave që mund të sjellin rrebeshe të izoluara shiu, të shoqëruara me vetëtima dhe bubullimë.
I njëjti skenar do të shtrihet edhe në rajon. Në Shqipëri, Maqedoninë e Veriut, Luginën e Preshevës dhe Malin e Zi, dita e shtunë do të karakterizohet nga mot kryesisht me diell dhe valë intensive të të nxehtit. Temperaturat pritet të arrijnë ose edhe të tejkalojnë shifrën 40°C në zonat më të nxehta të rajonit. Edhe këtu, pasditja mund të sjellë rrebeshe të rralla lokale në zonat malore.
Autoritetet u bëjnë thirrje qytetarëve të shmangin ekspozimin në diell gjatë orëve të pikut, të konsumojnë më shumë lëngje dhe të qëndrojnë në ambiente të freskëta, për të shmangur problemet shëndetësore që lidhen me të nxehtit ekstrem.
