nstituti Kombëtar i Shëndetësisë Publike të Kosovës (IKShPK) ka lëshuar një njoftim urgjent për qytetarët lidhur me valën e të nxehtit që po përfshin vendin, duke theksuar rrezikun në rritje për shëndetin publik, veçanërisht për grupet e cenueshme si të moshuarit dhe fëmijët.
Sipas IKShPK-së, temperaturat e larta që zgjasin gjatë ditës dhe natës mund të shkaktojnë stres të madh në organizëm dhe të rrisin ndjeshëm mundësinë për probleme shëndetësore, deri edhe në pasoja fatale.
Rekomandimet kryesore për mbrojtje nga nxehtësia:
-
Shmangni daljet në diell gjatë orëve më të nxehta të ditës, nga ora 10:00 deri në 17:00. Qëndroni në hije dhe kaloni 2–3 orë në ambiente të freskëta.
-
Përdorni veshje të lehta, preferohet pambuku. Bëni dush të ftohtë dhe konsumoni ujë të mjaftueshëm – së paku një gotë në orë ose 2–3 litra në ditë.
-
Mbani shtëpinë të freskët – hapni dritaret gjatë natës dhe mbani të mbyllura gjatë ditës për të shmangur hyrjen e nxehtësisë. Përdorni perde ose mjete mbrojtëse ndaj diellit.
Kujdes i veçantë për të moshuarit dhe fëmijët:
IKShPK bën thirrje për kujdes të shtuar ndaj personave mbi 65 vjeç, veçanërisht atyre që jetojnë vetëm ose kanë sëmundje kronike. Po ashtu, paralajmëron prindërit që të mos lënë fëmijët në veturë, as për një moment, dhe të shmangin ekspozimin e tyre në diell gjatë orëve të rrezikshme.
Në rast të ndonjë gjendjeje të rënduar shëndetësore apo shenjash të goditjes nga nxehtësia, qytetarët këshillohen të kontaktojnë menjëherë mjekun më të afërt ose të telefonojnë urgjencën në numrin 194.
