Ushtria izraelite (IDF) ka shkatërruar mbi 70 kamionë me ndihma humanitare të destinuara për Gazën, pasi përmbajtja e tyre ishte dekompozuar dhe konsideruar e papërdorshme për konsum njerëzor. Ushqimet, që përfshijnë mijëra artikuj ushqimorë, kishin mbetur për javë të tëra të bllokuara në anën palestineze të pikës kufitare Kerem Shalom.
Sipas autoriteteve izraelite, skadimi i ndihmave u bë i pashmangshëm për shkak të pengesave në shpërndarjen e tyre drejt zonave të rrethuar brenda Rripit të Gazës. Temperatura të larta dhe mungesa e kushteve adekuate të ruajtjes i bënë ndihmat të papërshtatshme për përdorim.
Aktualisht, mijëra pako të tjera me ndihma humanitare qëndrojnë ende në pritje për t’u futur në territorin palestinez. Nëse vonesat vazhdojnë, ekziston rreziku i përsëritjes së të njëjtit fat edhe për këto furnizime.
Shkatërrimi i ndihmave po ndodh në një moment kur situata humanitare në Gaza është kritike. Organizatat ndërkombëtare paralajmërojnë për përkeqësim të krizës së urisë, ndërsa raportet nga terreni flasin për dhjetëra vdekje si pasojë e kequshqyerjes dhe mungesës së ndihmës bazike.
Zyrtarë të OKB-së dhe organizata të ndihmës humanitare kanë bërë thirrje për hapjen e korridoreve të sigurta dhe përshpejtimin e procedurave për shpërndarjen e ndihmës, në mënyrë që të shmanget një katastrofë më e gjerë njerëzore në territoret palestineze.
