Lideri i Kampionatit Botëror, Oscar Piastri, ka siguruar ‘pole-position’ për Sprintin e tretë të sezonit të Formula 1, duke lënë pas emra të mëdhenj si Max Verstappen dhe shokun e skuadrës te McLaren, Lando Norris.
Piastri regjistroi kohën më të shpejtë në kualifikimet e së premtes për Çmimin e Madh të Belgjikës, me një rekord prej 1 minutë e 40.510 sekonda. Piloti australian ishte 477 të mijëtat më i shpejtë se Verstappen (Red Bull) dhe 618 të mijëtat përpara Lando Norrisit në makinën tjetër McLaren MCL39.
Ferrari në hije, Ocon dhe Sainz befasojnë
Charles Leclerc ishte i vetmi pilot i Ferrarit që përfundoi në top-10, duke zënë vendin e katërt, 768 të mijëtat pas Piastrit. Performanca e dobët e “kokëkuqes” la shumë për të dëshiruar, ndërkohë që surprizat dolën nga skuadra si Haas dhe Williams.
Esteban Ocon (Haas, me motor Ferrari) dhe Carlos Sainz (tashmë pilot i Williams) siguruan një rresht të tretë befasues. Më pas u renditën Oliver Bearman dhe Pierre Gasly (Alpine), ndërsa Isack Hadjar (Racing Bulls) dhe Gabriel Bortoleto (Sauber) plotësuan dhjetëshen më të mirë.
Hamilton dhe Antonelli jashtë që në Q1
Në një kthesë të papritur të ngjarjeve, Lewis Hamilton dhe Andrea Kimi Antonelli – të cilët kishin siguruar pole-position në dy garët e mëparshme të shkurtra – u eliminuan menjëherë në sektorin e parë të kualifikimeve (Q1). Të dy pilotët pësuan rrotullime të makinave të tyre, duke mos arritur të përfundojnë xhirot vendimtare.
“Pata një problem me makinën. U rrotullova pasi u bllokua rrota e pasme. Mendoj se është hera e parë që më ndodh kjo në karrierën time”, deklaroi Hamilton pas garës.
Gara Sprint dhe nisja e së dielës
Pilotët do të rikthehen në pistë të shtunën në orën 16:00 për garën Sprint, e cila jo vetëm shpërndan pikë të rëndësishme, por edhe përcakton renditjen e nisjes për garën kryesore të së dielës (ora 15:00).
McLaren duket më e fortë se kurrë këtë fundjavë, por me Verstappen në rreshtin e parë, gara mbetet e hapur. Ferrari ndërkohë do të kërkojë të shpëtojë ç’të mundet nga një fundjavë që nisi në hije.
