Kryeministri në detyrë i Republikës së Kosovës, Albin Kurti, bashkë me anëtarë të kabinetit qeveritar, zhvilloi sot në mëngjes homazhe pranë varrit të veprimtarit të shquar, Adem Demaçit, në përvjetorin e 7-të të ndarjes së tij nga jeta.
Në ceremoninë përkujtimore, u vendosën lule të freskëta pranë varrit të njohur si “Baca Adem”, simbol i rezistencës dhe qëndresës për çlirimin dhe bashkimin e kombit shqiptar.
“Gazetar e shkrimtar, veprimtar e intelektual, i përndjekur dhe i burgosur politik, i lauruar për paqe dhe përfaqësues politik i luftëtarëve të lirisë – Adem Demaçi ishte mishërimi i çështjes kombëtare shqiptare,” deklaroi Kurti gjatë homazheve. “Ai ishte personalitet unik në veprim dhe në gjuhën e tij, me një vetëmohim të pashoq për të tjerët.”
Demaçi, i cili vuajti mbi 28 vjet burg në Jugosllavi për aktivitetin e tij politik dhe angazhimin për të drejtat e shqiptarëve, mbetet një nga figurat më të respektuara në historinë moderne të Kosovës.
“Lavdi jetës dhe veprës së Adem Demaçit!”, përfundoi Kurti në mesazhin e tij përkujtimor.
