Policia e Kosovës ka arrestuar një person të dyshuar për veprën penale “Zjarrvënie”, pas një incidenti të ndodhur në lagjen “Kodra e Minatorëve” në Mitrovicën e Veriut, ku një zjarr përfshiu një sipërfaqe të madhe me rrezik për banesat dhe automjetet përreth.
Ngjarja ndodhi të shtunën, rreth orës 15:55, kur Stacioni Policor në Mitrovicën e Veriut mori informacion për një zjarr të shpërthyer në këtë lagje. Njësitë policore reaguan menjëherë, ndërsa në vendin e ngjarjes intervenuan edhe zjarrfikësit, të cilët, në bashkëpunim me policinë, arritën ta lokalizojnë dhe ta shuajnë zjarrin pa pasoja në njerëz.
Zjarri kishte rrezikuar disa shtëpi dhe automjete që ndodheshin në afërsi, por falë ndërhyrjes së shpejtë të autoriteteve, u arrit të shmangej përhapja e mëtejme dhe dëmet e mundshme.
Hetimet e zhvilluara nga njësia hetimore e Stacionit Policor në Mitrovicën e Veriut zbuluan se zjarri ishte shkaktuar qëllimisht. Njësia hetimore siguroi një video-incizim ku një person shihet duke i vënë zjarr barishtes.
I dyshuari, i identifikuar si Z.M., 42 vjeç, është arrestuar në banesën e tij në Mitrovicën e Veriut. Me urdhër të Prokurorit të Shtetit, ai është ndaluar për 48 orë dhe ndaj tij është iniciuar procedurë penale për veprën “Zjarrvënie”.
Policia e Kosovës apelon tek qytetarët që të shmangin ndezjen e zjarreve në hapësira të hapura, veçanërisht gjatë muajve të nxehtë, pasi rrezikojnë jetën, pronën dhe ambientin.
Autoritetet gjithashtu inkurajojnë qytetarët që të raportojnë çdo veprim të dyshimtë përmes numrit emergjent 192, apo përmes kanaleve të tjera zyrtare të komunikimit. Bashkëpunimi qytetar, thekson Policia, është thelbësor në parandalimin dhe zbulimin e veprave penale.
