Njësitë Antikontrabandë të Doganës së Kosovës kanë ndërmarrë sot një aksion të suksesshëm në magjistralen Prishtinë–Mitrovicë, ku gjatë një kontrolli rutinë kanë ndaluar një automjet transportues të dyshimtë që po udhëtonte në drejtim të veriut të vendit.
Pas kontrollit të detajuar të automjetit, zyrtarët doganorë kanë zbuluar dhe sekuestruar 2,800 pako me gjithsej 87,000 copë tableta të substancës psikotrope DIAZEPAM, e njohur ndryshe me emrin tregtar “Apaurin”. Kjo substancë, e përfshirë në listën e kontrolleve sipas Ligjit nr. 02/L-128 për Narkotikët, Substancat Psikotrope dhe Prekursorët, klasifikohet si substancë psikotrope e ndaluar për qarkullim pa autorizim të posaçëm.
Menjëherë pas konstatimit, zyrtarët doganorë kanë njoftuar Sektorin e Hetimeve në kuadër të Doganës, i cili në koordinim me Prokurorin Kujdestar nga Prokuroria Themelore në Prishtinë dhe në bashkëpunim me Inspektoratin Farmaceutik, kanë ndërmarrë të gjitha procedurat ligjore për konfiskimin dhe ekzaminimin e mallit.
Personi përgjegjës për substancat e konfiskuara është ndaluar me urdhër të prokurorit kompetent dhe është dërguar në mbajtje për 48 orë, ndërsa hetimet për rastin po vazhdojnë në mënyrë të intensifikuar.
Dogana e Kosovës thekson se mbetet e përkushtuar në luftimin e kontrabandës dhe në ruajtjen e shëndetit publik, duke vazhduar bashkëpunimin e ngushtë me të gjitha institucionet për zbatimin e ligjit.
