Komisioni Evropian ka propozuar pezullimin e pjesshëm të pjesëmarrjes së Izraelit në programin kërkimor dhe inovativ të Bashkimit Evropian “Horizon Europe”, si reagim ndaj situatës së përkeqësuar humanitare në Rripin e Gazës.
Sipas raportimit të Radios Evropa e Lirë (REL), propozimi i Brukselit do të diskutohet të martën nga përfaqësuesit e 27 shteteve anëtare të BE-së. Nëse miratohet nga shumica e vendeve, ai do të hyjë në fuqi dhe do të kufizojë qasjen e kompanive izraelite – sidomos start-upeve që veprojnë në fusha si teknologjia e dronëve, siguria kibernetike dhe inteligjenca artificiale – në fondet e BE-së.
Ky veprim vjen në kohën kur disa shtete të BE-së po kërkojnë masa më të ashpra ndaj Izraelit, për shkak të pasojave të luftës në Gaza, ku mbi 2 milionë banorë përballen me uri dhe kequshqyerje. Komisioni Evropian theksoi se ndonëse Izraeli ka shpallur pauza ditore humanitare në luftime, “situata mbetet e rëndë”.
Shefja e diplomacisë së BE-së, Kaja Kallas, ka paraqitur më herët një sërë opsionesh për ndëshkimin e Izraelit, pasi ky i fundit është akuzuar për shkelje të marrëveshjes së asociimit me BE-në, e cila mbështetet në respektimin e të drejtave të njeriut.
Ndërkohë, Brukseli njoftoi se ka arritur një marrëveshje me Izraelin për të përmirësuar qasjen në ndihma humanitare në Gaza. Të hënën, kamionë me ndihma arritën në territorin palestinez, pas premtimeve të Tel Avivit për hapjen e korridoreve të sigurta, por agjencitë ndërkombëtare paralajmëruan se nevojiten sasi shumë më të mëdha për të shmangur një krizë të urisë në shkallë të gjerë.
Propozimi për kufizimin e qasjes në fondet e “Horizon” – një nga instrumentet më të mëdha kërkimore në botë – shihet nga analistët si një sinjal i parë nga BE-ja se është e gatshme të ndërmarrë masa konkrete nëse situata humanitare në Gaza nuk përmirësohet.
Në vitin 2024, Izraeli ishte ndër tre vendet me numrin më të madh të kompanive pjesëmarrëse në këtë program, krahas Gjermanisë dhe Francës.
