Pas përdhosjes së flamurit kombëtar në Suharekë disa ditë më parë, një tjetër akt vandal ka tronditur opinionin publik në Kosovë. Kësaj radhe, objektiv i sulmit është bërë shtatorja e Gjergj Kastriotit Skënderbeut në Prizren. Sipas informacioneve zyrtare, pjesë të monumentit – përkrenarja dhe shpata e heroit kombëtar – janë lyer me ngjyrë ari, duke shkaktuar indinjatë të gjerë.
Shoqata “Trojet e Arbrit” ka reaguar ashpër ndaj ngjarjes, duke e cilësuar si një “sulm të shëmtuar dhe të qëllimshëm ndaj figurës më të ndritur të historisë sonë kombëtare”. Kryetari i shoqatës, Nue Oroshi, ka kërkuar përmes një reagimi në rrjete sociale që organet e sigurisë dhe drejtësisë të veprojnë menjëherë dhe të sjellin para drejtësisë autorët e aktit.
“Ky është një akt i papranueshëm, një provokim i qëllimshëm që cenon jo vetëm figurën e Skënderbeut, por edhe krenarinë tonë kombëtare,” ka theksuar Oroshi.
Ndërkohë, Policia Rajonale e Prizrenit ka konfirmuar se është duke hetuar rastin. Zyrtarët policorë kanë njoftuar se zona ku ndodhet shtatorja është e mbuluar me kamera sigurie, të cilat mund të jenë kyçe për identifikimin e autorëve të mundshëm. Hetimet do të zhvillohen në bashkëpunim të ngushtë me Prokurorinë kompetente.
Shtatorja e Gjergj Kastriotit Skënderbeut është vendosur më 28 nëntor të vitit 2020 në rrethrrotullimin e rrugës “Hasan Prishtina” në Prizren dhe konsiderohet si një nga simbolet më të rëndësishme historike dhe kombëtare të qytetit. Dëmtimi i saj ka ngjallur reagime të forta në opinion dhe në qarqet e shoqërisë civile, të cilat e shohin këtë veprim si një përpjekje për të provokuar ndjenja patriotike dhe për të sfiduar identitetin kombëtar.
