Zyra e Fondacionit Friedrich Ebert në Prishtinë, në bashkëpunim me Institutin e Kosovës për Drejtësi (IKD), organizoi sot një tryezë të veçantë diskutimi me përfaqësues të partive politike, shoqërisë civile dhe mediave, me fokus në nevojën urgjente për dialog dhe konsensus politik.
Qëllimi i takimit ishte adresimi i sfidave në funksionimin e institucioneve demokratike dhe rëndësia e ruajtjes së paqes sociale në vend. Tryeza u vlerësua si një hap i rëndësishëm në drejtim të ndërtimit të urave të bashkëpunimit ndërmjet akterëve politikë dhe shoqërorë, duke u fokusuar në gjetjen e zgjidhjeve të përbashkëta për sfidat me të cilat përballet Kosova.
Përfaqësuesit e Fondacionit theksuan se angazhimi për dialog konstruktiv është thelbësor për forcimin e demokracisë dhe tejkalimin e krizave politike. Ata ritheksuan zotimin e Fondacionit për të vazhduar mbështetjen dhe krijimin e platformave gjithëpërfshirëse për bashkëbisedim dhe ndërtim të konsensusit politik.
Diskutimi i mbajtur u mirëprit si një nismë që synon të sjellë palët në tryezë dhe të nxisë një qasje të re për bashkëqeverisje, stabilitet institucional dhe zhvillim demokratik.
