E shtuna në Kosovë pritet të karakterizohet nga mot me diell dhe vranësira të pakta lokale, me temperatura të larta që do të arrijnë deri në 32 apo 33 gradë Celsius. Pjesa më e madhe e ditës do të jetë nën ndikimin e motit të qëndrueshëm, mirëpo gjatë pasdites parashihen zhvillime të përkohshme të vranësirave, të cilat mund të sjellin rrebeshe të izoluara shiu, të shoqëruara me vetëtima dhe bubullimë, kryesisht në zonat kodrinore dhe malore.
Kushtet e ngjashme meteorologjike do të mbizotërojnë edhe në Shqipëri, Maqedoninë e Veriut, Luginën e Preshevës dhe në Mal të Zi. Moti do të jetë kryesisht me diell dhe tipikisht veror, ndërsa në orët e pasdites nuk përjashtohet mundësia për rrebeshe të shkurtra lokale shiu në disa rajone malore, të shoqëruara me fenomene atmosferike si vetëtima dhe bubullimë.
Rrebeshet, nëse zhvillohen, do të jenë të përkohshme dhe nuk do të ndikojnë në përgjithësi në stabilitetin e motit që mbetet i nxehtë dhe veror në të gjithë rajonin. Autoritetet meteorologjike u bëjnë thirrje qytetarëve të shmangin ekspozimin e gjatë në diell gjatë orëve të pikut dhe të marrin masa mbrojtëse kundër temperaturave të larta.
