Ish-nënpresidentja e Shteteve të Bashkuara, Kamala Harris, ka konfirmuar se nuk do të kandidojë për postin e guvernatores së Kalifornisë në zgjedhjet e ardhshme, duke hedhur poshtë spekulimet për një rikthim të shpejtë në skenën politike pas humbjes së saj ndaj Donald Trump në zgjedhjet presidenciale të nëntorit.
Në një deklaratë të shpërndarë përmes platformës X (ish-Twitter), Harris theksoi se ka kaluar muaj reflektimi dhe vlerësimi pas garës së fundit zgjedhore. “Gjatë muajve të fundit, kam menduar seriozisht t’i kërkoj popullit të Kalifornisë privilegjin për të qenë guvernatorja e tyre. E dua këtë shtet, njerëzit e tij dhe premtimet që mbart. Është shtëpia ime. Por pas një reflektimi të thellë, kam vendosur që nuk do të kandidoj për guvernatore në këto zgjedhje”, – u shpreh ajo.
Harris do të kishte sfiduar guvernatorin aktual Gavin Newsom, një figurë e njohur në skenën demokrate dhe kritik i vazhdueshëm i ish-presidentit Trump, sidomos për politikat migratore.
Në mesazhin e saj publik, Harris vlerësoi punën e atyre që shërbejnë në qeveri dhe në institucione publike, duke nënvizuar se sistemi politik amerikan ndodhet përballë një krize besimi. “Në të njëjtën kohë, duhet të pranojmë se politika jonë, qeveria dhe institucionet tona shpesh kanë zhgënjyer popullin amerikan, duke kulmuar në këtë moment krize,” – shkroi ajo.
Pavarësisht vendimit për të mos kandiduar në nivel shtetëror, Harris nuk e ka mbyllur derën për një garë të ardhshme në skenën federale. Ajo ka lënë të hapur mundësinë e një rikandidimi për Shtëpinë e Bardhë në vitin 2028, me ambicien për të bërë historinë si presidentja e parë grua në SHBA.
Në fund të deklaratës së saj, Harris theksoi rëndësinë e rinovimit të qasjes politike: “Duke parë përpara, duhet të jemi të gatshëm të ndjekim ndryshimin përmes metodave të reja dhe mendimit të freskët, duke iu përmbajtur vlerave dhe parimeve tona, por pa u kufizuar nga i njëjti skenar.”
Për momentin, ajo ka njoftuar se do të ndajë më shumë për planet e saj në muajt e ardhshëm.
