Një zbulim i rëndësishëm arkeologjik është bërë në Ulpianë, ku ekipi i arkeologëve ka identifikuar një mbishkrim të dytë historik kushtuar Perandorit Justinian dhe bashkëshortes së tij, Teodora.
Lajmi u bë i ditur nga ministri i Kulturës, Rinisë dhe Sportit, Hajrulla Çeku, i cili theksoi rëndësinë e këtij zbulimi, duke e konsideruar atë si një ndër dëshmitë më të rralla të trashëgimisë kulturore në rajon. Mbishkrimi i ri tregon ndërtimin e një bazilike episkopale dhe i bashkohet atij të mëparshëm që përmendte themelimin e qytetit Iustiniana Secunda si qytet i Dardanisë.
“Këto janë të vetmet dedikime të njohura të Perandorit Justinian, perandor me prejardhje nga ky rajon,” theksoi Çeku.
Ai shtoi se trashëgimia arkeologjike po trajtohet me një përkushtim dhe seriozitet të paparë më parë. Sipas tij, hulumtimet në Ulpianë dhe në lokalitetin arkeologjik të Dresnikut po zhvillohen në prona publike të shpronësuara gjatë vitit të kaluar. Aktualisht, punimet po përqendrohen në konservimin dhe menaxhimin e lokaliteteve, në ngritjen e kapaciteteve profesionale përmes partneriteteve ndërkombëtare, si dhe në publikimin e rezultateve shkencore.
“Arkeologjia vazhdon të na zbulojë historinë tonë. Ne vazhdojmë me përkushtim hulumtimin dhe mbrojtjen e saj,” përfundoi ministri Çeku në njoftimin e tij.
Zbulimet e reja forcojnë më tej identitetin historik të Ulpianës si një nga qendrat më të rëndësishme të antikitetit në territorin e sotëm të Kosovës.
