Një ngjarje e rëndë kriminale ka tronditur komunën e Lipjanit, pasi një trup i pajetë është gjetur i groposur në fshatin Baincë, në rrethana që po hetohen si vrasje e rëndë.
Zëdhënësja e Policisë për rajonin e Prishtinës, Flora Ahmeti, ka konfirmuar rastin për mediat, duke theksuar se trupi është ende i paidentifikuar zyrtarisht dhe se hetimet po zhvillohen në bashkëpunim të ngushtë me prokurorinë kompetente.
“Dje rreth orës 12:00, në fshatin Baicë të Lipjanit, është gjetur i groposur një trup i pajetë. Hetuesit policorë, në koordinim me prokurorinë, kanë nisur veprimet procedurale, ndërsa trupi është dërguar në Institutin e Mjekësisë Ligjore për autopsi dhe identifikim,” bëri të ditur Ahmeti.
Sipas burimeve nga vendi i ngjarjes, trupi është zbuluar nga familjarët e viktimës, i cili ishte raportuar si i zhdukur disa ditë më parë. Dyshohet se viktima është Enver Bajraktari, për të cilin familja kishte kërkuar ndihmën e publikut dhe autoriteteve për ta gjetur.
Policia e Kosovës ka konfirmuar se rasti po trajtohet si vrasje e rëndë, ndërsa hetimet janë në zhvillim për të zbardhur motivet dhe autorët e kësaj krime makabre.
Autoritetet u kanë bërë thirrje qytetarëve që të ndihmojnë me çdo informacion të mundshëm që mund të ndihmojë në zbardhjen e plotë të rastit.
