Në selinë e Departamentit Amerikan të Shtetit në Uashington, Sekretari i Shtetit, Marco Rubio, dhe Ministri i Jashtëm i Serbisë, Marko Gjuriç, zhvilluan një takim që u cilësua si historik për raportet mes dy vendeve. Takimi shënon një pikë kthese në qasjen e administratës amerikane ndaj Serbisë, e cila, sipas të dyja palëve, po shihet gjithnjë e më shumë si një partner strategjik në rajonin e Ballkanit.
Në deklaratat për media para takimit, Sekretari Rubio u ndal shkurtimisht edhe në një çështje të ndjeshme në planin ndërkombëtar – sanksionet ndaj Rusisë pas takimit të ambasadorit amerikan Witkoff me presidentin Vladimir Putin.
“Do të kemi më shumë për të thënë më vonë sot,” – tha Rubio.
“Ambasadori Witkoff është duke u kthyer. Fola me të disa minuta më parë. Do të vazhdojmë diskutimet gjatë ditës dhe shpresojmë të kemi njoftime së shpejti – ndoshta pozitive, ndoshta jo. Do ta shohim.”
Pas deklarimeve fillestare, fokusi u zhvendos në marrëdhëniet SHBA–Serbi. Rubio konfirmoi publikisht përmes një postimi në platformën X se dialogu strategjik me Serbinë do të nisë shumë shpejt dhe se administrata amerikane është e përkushtuar ndaj thellimit të partneritetit me Beogradin.
Nga ana e tij, ministri serb Gjuriç e cilësoi takimin si një prej më të rëndësishmëve në dekadat e fundit. Ai theksoi se është hapur një dritare e re bashkëpunimi që do ta përfshijë jo vetëm nivelin diplomatik, por edhe atë ekonomik dhe të sigurisë.
“Kjo është një mundësi historike për të ngritur marrëdhëniet Serbi–SHBA në një nivel që nuk është parë prej brezash,” – tha Gjuriç.
“SHBA-ja po e sheh Serbinë si një partner natyral në rajon. Dialogu strategjik do ta vendosë vendin tonë në një pozicion të ri në sytë e politikës amerikane.”
Sipas Gjuriç, administrata e presidentit Trump (në përgatitje për zgjedhje në 2026) po i rikthehet një qasje më të balancuar në Ballkan, ku nuk kërkon më nënshtrim politik, por partneritet funksional. Në këtë kontekst, Serbia shpreson të rrisë ndikimin e saj rajonal dhe të përfitojë në aspektin ekonomik dhe diplomatik.
Gjatë takimit u diskutuan edhe zhvillimet në Kosovë, ku Gjuriç përcolli shqetësimet e Beogradit për, siç u shpreh ai, “presionin sistematik ndaj komunitetit serb”. Ai gjithashtu kërkoi mbështetje për lirimin e qytetarëve serbë të bllokuar në Rripin e Gazës, përfshirë nëntë gazetarë të një televizioni serb që pritet të evakuohen me ndërmjetësimin e SHBA-së.
Takimi Rubio–Gjuriç, në një kohë kur tensionet globale janë në rritje dhe pozicionimi rajonal po merr rëndësi strategjike, shihet si pjesë e përpjekjeve amerikane për të forcuar linjat e bashkëpunimit me vendet kyçe të Evropës Juglindore.
