Policia e Kosovës ka ndërhyrë pas një ankese të pranuar nga qytetarët për bllokimin e rrugës “Alush Kryeziu” në qytetin e Prizrenit, me ç’rast ka identifikuar një shkelje të autorizimit të dhënë për përdorim të përkohshëm të rrugës gjatë një gazmendi familjar.
Incidenti ka ndodhur më 6 gusht 2025, rreth orës 16:40, kur rruga ishte bllokuar plotësisht në të dy shiritat e qarkullimit, ndonëse leja komunale e prezantuar nga organizatori lejonte përdorimin vetëm të njërës korsi dhe vetëm për një orar të caktuar, nga ora 09:30 deri në 10:30 të mëngjesit.
Njësiti patrullues i Stacionit Policor në Prizren ka ndërhyrë menjëherë në vendin e ngjarjes, duke konstatuar shkelje të kushteve të lejes dhe duke ndërmarrë masa konform ligjit. Personit përgjegjës i është shqiptuar një gjobë në vlerë prej 300 euro, ndërsa rruga është liruar për qarkullim normal të automjeteve.
Policia e Kosovës u bën thirrje qytetarëve që të respektojnë dispozitat ligjore dhe autorizimet për ngjarje publike apo familjare, në mënyrë që të mos pengohet liria e lëvizjes dhe siguria në komunikacion.
