Ambasada e Mbretërisë së Bashkuar në Prishtinë ka bërë thirrje për respektim të plotë të pavarësisë së Gjykatës Kushtetuese të Kosovës, duke theksuar se funksionimi i saj i paanshëm është thelbësor për ruajtjen e demokracisë dhe sundimit të ligjit në vend.
Në një deklaratë publike të shpërndarë në rrjetet sociale, Ambasada britanike rikujton se Gjykata Kushtetuese ka procedura të përcaktuara mirë për shqyrtimin dhe marrjen e vendimeve, dhe se integriteti i këtij institucioni duhet të ruhet në mënyrë të pandërprerë.
“Aftësia e Gjykatës për të funksionuar në mënyrë të pavarur është jetike për demokracinë e Kosovës. Kjo duhet të respektohet dhe promovohet nga të gjitha palët, dhe vendimet e Gjykatës të respektohen dhe zbatohen”, thuhet në reagimin zyrtar.
Kjo deklaratë vjen në një periudhë me zhvillime të ndjeshme politike dhe juridike në vend, ku roli i Gjykatës Kushtetuese mbetet qendror në ruajtjen e balancës kushtetuese dhe zgjidhjen e kontesteve të karakterit institucional.
Burimi: Ambasada Britanike në Prishtinë
