Qeveria gjermane ka vendosur të ndalojë të gjitha eksportet ushtarake drejt Izraelit që mund të përdoren në Rripin e Gazës, pas vendimit të kabinetit izraelit të sigurisë për të miratuar një plan të ri ushtarak që parashikon marrjen e kontrollit të Qytetit të Gazës.
Kancelari Friedrich Merz e njoftoi këtë hap të premten, duke theksuar se “në këto rrethana, qeveria gjermane nuk do të autorizojë asnjë eksport të pajisjeve ushtarake që mund të përdoren në Rripin e Gazës deri në njoftim të mëtejshëm”.
Vendimi vjen vetëm një ditë pasi kryeministri izraelit Benjamin Netanyahu deklaroi se forcat izraelite synojnë kontrollin e plotë ushtarak të të gjithë Rripit të Gazës, pavarësisht kritikave ndërkombëtare për numrin e lartë të viktimave civile dhe krizën e thelluar humanitare.
Merz tha se, ndonëse Gjermania vazhdon të mbështesë të drejtën e Izraelit për vetëmbrojtje dhe lirimin e robërve të mbajtur nga Hamasi, nuk mund të injorohet më numri në rritje i viktimave civile. Ai paralajmëroi se operacionet e reja tokësore do të përkeqësonin gjendjen humanitare dhe i kërkoi Izraelit të sigurojë akses të plotë e të qëndrueshëm për organizatat humanitare, përfshirë Kombet e Bashkuara.
Sipas autoriteteve shëndetësore të Gazës, 197 persona, përfshirë 96 fëmijë, kanë humbur jetën nga kequshqyerja gjatë konfliktit. Një raport i mbështetur nga OKB-ja paralajmëron se uria po përhapet në enklavë, ndërsa kufizimet në furnizimet me ndihma mbeten të ashpra.
Gjermania është një nga furnizuesit kryesorë të armëve për Izraelin, me licenca eksporti që nga tetori 2023 deri në maj 2024 në vlerë prej 485 milionë eurosh. Vendimi i Berlinit pritet të ketë ndikim të drejtpërdrejtë në kapacitetet ushtarake të Izraelit për operacionet në Gaza.
Kabineti i sigurisë i Izraelit ka bërë të ditur se ushtria do të përgatitet për marrjen e kontrollit të Qytetit të Gazës, duke premtuar njëkohësisht ofrimin e ndihmës humanitare për popullsinë civile jashtë zonave të luftimeve.
