E diela në Kosovë pritet të shënojë një tjetër ditë të nxehtë tipike të verës, me mot kryesisht me diell dhe temperatura në rritje. Sipas parashikimeve, vlerat maksimale do të arrijnë deri në 38°C.
Mëngjesi pritet të jetë relativisht i freskët në disa rajone, me temperatura minimale prej 15–16°C, ndërsa në zonat më të nxehta do të regjistrohen net tropikale, ku termometri nuk zbret nën 20°C.
Edhe në Shqipëri, Maqedoninë e Veriut, Luginën e Preshevës dhe Malin e Zi pritet mot përvëlues. Në shumë prej zonave që tradicionalisht njihen për vapë ekstreme, temperaturat do të arrijnë 38–40°C, me mundësi që në disa vende të kapërcejnë edhe këtë prag.
Autoritetet meteorologjike rekomandojnë kujdes të shtuar gjatë orëve të mesditës, si dhe hidrimin e rregullt për të shmangur pasojat e nxehtësisë së lartë.
