Policia e Kosovës ka zhvilluar një sërë operacionesh në ditët e fundit, duke sekuestruar armë zjarri në disa qytete të vendit dhe duke ndaluar persona të dyshuar për përdorim të tyre në mënyrë të kundërligjshme.
Malishevë – Më 7 gusht 2025, në fshatin Lladroviq, Njësia Hetimore e Stacionit Policor Malishevë pranoi një informatë për të shtëna me armë zjarri. Pas hetimeve, u identifikuan dy të dyshuar dhe u sekuestrua arma e përdorur. Gjatë kontrollit në shtëpitë e tyre, policia gjeti dhe sekuestroi një pushkë gjysmë automatike, 7 fishekë, 8 gëzhoja dhe dy granata dore. Me urdhër të prokurorit, ndaj tyre u iniciuan rastet për “Mbajtje të paautorizuar të armëve” dhe “Përdorim të armës apo mjetit të rrezikshëm”. Të dyshuarit u liruan në procedurë të rregullt.
Rahovec – Më 11 gusht 2025, në rrugën “Selajdin Mullabazi”, policia ndërhyri pas raportimeve për të shtëna. Një i dyshuar u arrestua në vendngjarje dhe iu sekuestruan një pistoletë, një karikator, 2 fishekë dhe 6 gëzhoja të kalibrit 7.62 mm. Ai po hetohet për “Mbajtje të paautorizuar të armëve” dhe “Shkaktim të rrezikut të përgjithshëm” dhe është dërguar në mbajtje për 48 orë.
Vushtrri – Po sot, rreth orës 08:20, një qytetar raportoi se nga një predhë i ishte dëmtuar dritarja e shtëpisë së tij në fshatin Shtitaricë. Pas veprimeve operative, policia identifikoi lokacionin nga ku dyshohet se ishte shtënë gjatë një ahengu familjar. I dyshuari u identifikua dhe iu konfiskua një pistoletë. Në vendin e ngjarjes u gjetën një gëzhojë dhe një predhë. Ai u lirua në procedurë të rregullt, ndërsa po hetohet për “Mbajtje në pronësi, kontroll ose posedim të paautorizuar të armës”, “Përdorim i armës” dhe “Shkaktim i rrezikut të përgjithshëm”.
Prizren – Në dhjetë ditët e para të muajit gusht, Drejtoria Rajonale e Policisë në Prizren ka intensifikuar veprimet parandaluese në kuadër të Planit Operativ “Sezoni Veror 2025” me moton “Festo me zemër, jo me armë”. Gjatë këtij operacioni janë identifikuar disa raste të të shtënave festive, janë arrestuar disa persona dhe janë sekuestruar gjithsej 11 armë zjarri (7 pistoleta dhe 4 pushkë), si dhe një sasi e konsiderueshme municioni. Ndaj të gjithë të dyshuarve janë ngritur kallëzime penale për “Mbajtje të paautorizuar të armëve” dhe “Shkaktim i rrezikut të përgjithshëm”.
Policia e Kosovës apelon te qytetarët që të bashkëpunojnë në parandalimin e përdorimit të armëve zjarri, duke theksuar se çdo veprim i tillë paraqet rrezik serioz për jetën dhe sigurinë publike.
