Presidenti i SHBA-së, Donald Trump, ka ashpërsuar tonet ndaj homologut ukrainas Volodymyr Zelensky, duke e akuzuar për mungesë fleksibiliteti në negociata dhe duke paralajmëruar se një zgjidhje për luftën në Ukrainë mund të arrihet vetëm përmes një takimi të drejtpërdrejtë me presidentin rus Vladimir Putin.
“Do ta kuptoj për dy minuta nëse Putin dëshiron të bëjë marrëveshje,” deklaroi Trump, duke shtuar se në fund do të përpiqet t’i fusë “Putinin dhe Zelenskyn në një dhomë” për të zgjidhur konfliktin, edhe pse takimi trepalësh nuk do të zhvillohet të premten siç ishte supozuar. Ai e përjashtoi pjesëmarrjen e Zelenskyt në takimin e ardhshëm në Alaskë, duke e kritikuar se “ka marrë pjesë në shumë samite të tjera kot”.
Trump la të hapur mundësinë e heqjes së disa sanksioneve ndaj Rusisë dhe rikthimin e shkëmbimeve tregtare, duke sugjeruar gjithashtu se mund të ketë “ndryshime të vijës kufitare” mes Rusisë dhe Ukrainës. Ai kërkoi që Kievi të bëjë lëshime territoriale, duke ironizuar mbi arsyetimin kushtetues të Zelenskyt për çdo marrëveshje të tillë.
Megjithëse pranoi se “nuk i takon atij ta përfundojë këtë luftë” dhe e quajti konfliktin “bota e Biden-it”, Trump theksoi se “Putini flet vetëm me mua dhe unë do t’i them ta ndalë”. Në një lapsus gjatë deklaratave, ai tha dy herë se “të premten po shkoj në Rusi”, duke iu referuar Alaskës, territor i blerë nga SHBA-ja në vitin 1867.
Ende nuk ka një vendim përfundimtar mbi vendndodhjen e takimit të mundshëm në Alaskë. Sipas burimeve të CNN, mes opsioneve po shqyrtohen resorti Aleyska në Girdwood, baza ushtarake Elmendorf-Richardson pranë Anchorage, hoteli Captain Cook dhe qyteti Fairbanks me bazën ajrore Eielson. Zyrtarët amerikanë po vlerësojnë vendet që përmbushin kriteret e sigurisë dhe logjistikës për një samit të tillë, ndërsa spekulimet vazhdojnë.
